Mattiu 18 - Tedim Bible

Kua Lianpen Hiam?

¹ Tua laitakin Jesuh kiangah nungzuite hong pai uh a, “Vantung ki-ukna sungah kua lianpen ding ahi hiam?” ci-in a dot uh ciangin,

² Jesuh in naupang khat samin amaute mai-ah dingsak a,

³ “A man mahmahin note kiangah kong genin-ah: Note kikheelin naupang na bat kei uhleh vantung ki-ukna sungah na lut ngei kei ding uh hi.

⁴ Hih naupang bangin a kiniamkhiat mite, vantung ki-ukna sungah a lianpen hi ding hi.

⁵ Keima min hangin hih bang naupang khat a limbawl mi in kei zong hong limbawl ahi hi.

Khialh nading Ze-etnate

⁶ “Ahi zongin kei a hong um hih naupangnote khatpeuh a khialsak mi pen a ngawngah an gawina suang lianpi khat kikhihin tuipi thuk sungah kikhiasuk le ama a dingin hoihzaw thampek ding hi.

⁷ “Tua bangin mi a khialsak thei ding om ahih manin leitung mite a dingin a dahhuai mahmah thu ahi hi. Tua bang pen a piang tawntung ding hi a, ahi zongin tua bangin khialhna a piangsak mite a dingin dahhuai pha mahmah diak hi.

⁸ “Na khut ahi a, na khe in ahi zongin hong khialhsak leh sattan inla paikhia in. Meikuang tawntung sungah khut kim khe kimin hong kikhiat sangin nuntakna sungah khut sam khe samin lut lecin nang a dingin hoihzaw ding hi.

⁹ Na mit in hong khialhsak leh khelkhia inla paikhia in. Mit kim nei-in hell khuk sungah hong kikhul sangin mit langkhat bek tawh nuntakna sungah lut lecin nang a dingin hoihzaw ding hi.

Tuu Mang Thugentehna

¹⁰ “Hih naupangnote khatpeuh na simmawhkhak loh nadingun kidawm un. Note kiangah kong genin-ah: Amaute a kem vantung mite pen vantungah ka Pa kiangah om tawntung uh hi.

¹¹ Bang hang hiam cih leh Mihing Tapa pen a mangthang mite a hon dingin a hong pai ahi hi.

¹² Note in bangci ngaihsut na hi uh hiam? Mi khat in tuu zakhat nei hen la, a tuute khat mang leh, mualtungah a gamta adang sawmkua le kuate nusia-in tua a mang pen a zong dingin kuankhia ding hi lo ahi hiam?

¹³ Note kiangah kong genin-ah: Tua a mang tuu a muh ciangin a mang lo tuu sawmkua le kuate tungah a lungdamna sangin a mang pen tungah a lungdamna lianzaw hi lo ahi hiam?

¹⁴ Tua mah bangin vantungah a om na Pa un hih naupangnote khat zong a sih ding a deih kei hi.

Sanggam A Khial pa

¹⁵ “Na sanggamte uh na tung uhah hong khialh leh pai-in no tegel bek theihin a khialhna va gen un. Na thu uh a hong man’ leh na sanggampa uh a ngahkik na hi uh hi.

¹⁶ Ahi zongin na thu uh a hong mannop kei leh, Lai Siangtho sungah, ‘Mi nih ahih kei leh mi thum’ theihna bek tawh mawhsakna khat peuhpeuh man pan hi,’ a cih mah bangin midang khat ahi a, nih ahi zongin tonpih un.

¹⁷ Amah in tua mite’ thu a mannop kei leh pawlpite tungah a thu ko un. Pawlpite’ thu nangawn a mannop kei leh Gentail mite le siahdongte bangin na ngaihsun un.

Phalna le Khamna

¹⁸ “Note kiangah a taktakin kong genin-ah: Leitungah na kham peuhmah uh vantungah zong kikham ding a, leitungah na phal peuhmah uh vantungah zong kiphal ding hi.

¹⁹ Leitungah note nih thukimin na nget uh na khat peuhpeuh, vantungah a om ka Pa in hong pia ding hi.

²⁰ Bang hang hiam cih leh keima minin mi nih le thum bek nangawn a kikhopna peuhpeuhah kei ka om hi,” a ci hi.

Mawhna a Maisak Nuam lo Nasempa Thugentehna

²¹ Tua ciangin Peter in Jesuh va naih a, “Topa aw, ka sanggamte khatpeuh ka tungah hong khialh ciangin bangzah vei maisak ding ka hi hiam? Sagihvei dongtak maisak ding ka hi hiam?” ci-in a dot ciangin

²² Jesuh in, “Sagihvei ciangbek maisak in kong ci kei hi. Sawm sagih mun sagihvei maisak in kong ci hi.

²³ Bang hang hiam cih leh vantung ki-ukna zia pen a nasemte in sum bangzah a ba hiam, ci-in a sazian a en kumpipa’ hihna zia tawh kibang hi.

²⁴ Kumpipa in a sum ba sazian a et a kipat ciangin ama sum mak tampi a ba nasem khat hong kipaipih hi.

²⁵ Tua nasempa in a sum lohzo lo ahih manin amah a kipan a zi a tate le a neih khempeuh zuakin a leiba a loh nadingin kumpipa in thu a pia hi.

²⁶ Tua ahih manin a nasempa zong a mai-ah hong bokin thum a, ‘Topa aw, hong ngak lai in; a vekpi-in ka hong loh ding hi,’ ci-in a thum hi.

²⁷ Kumpipa in khasiathuai sa ahih manin a leiba teng maisakin a khah hi.

²⁸ “Ahi zongin tua nasempa a paikhiat ciangin ama sum ngun peek zakhat khawng a ba a naseppih dang khat tawh a kituak hi. Tua pa a gawlin manin, ‘Na leiba hong loh in,’ a ci hi.

²⁹ A naseppih pa zong a mai-ah bokin hong thum a, ‘Hong ngak lai in; ka hong loh ding hi,’ a ci hi.

³⁰ Ahi zongin ama thumna sang nuam lo hi. A leiba a lohkhit matengin thongah a kia dingin a khumsak hi.

³¹ A naseppih dangte in hih thupiang a theih uh ciangin dahhuaisa mahmah uh ahih manin, a thupiang khempeuh kumpipa kiangah a ko uh hi.

³² Tua ciangin kumpipa in tua nasempa sam a, ‘A gilo nasempa aw, kei kiangah hong thum na hih manin na leiba khempeuh ka hong maisak hi.

³³ Nang ka hong hehpih mah bangin na naseppih pa zong na hehpih ding kilawm hi lo ahi hiam?’ a ci hi.

³⁴ Kumpipa zong a heh suak ahih manin a leiba khempeuh a lohkhit matengin thong sungah a kikhum nadingin thu a pia hi.

³⁵ “Tua mah bangin note in zong na lungsim uhah na sanggamte uh mawhna na maisaknop kei uhleh vantungah a om ka Pa in note tungah zong tua bangmahin a hong bawl ding ahi hi,” a ci hi.