Mattiu 1 - Tedim Bible

Jesuh Khrih’ Khang Thu

¹ Abraham’ suan David, David’ suan Jesuh Khrih’ khang ciaptehna hih bang ahi hi.

² Abraham ta Isaac, Isaac ta Jakob, Jakob ta Judah, le a sanggamte ahi uh hi.

³ Judah ta Perez le Zerah hi a, Tamar tawh a neih a ta ahi uh hi. Perez ta Hezron, Hezron ta Ram,

⁴ Ram ta Amminadab, Amminadab ta Nahshon, Nahshon ta Salmon,

⁵ Salmon ta Boaz, Rahab tawh a neih a ta ahi hi. Boaz ta Obed, Ruth tawh a neih a ta ahi hi. Obed ta Jessi,

⁶ Jessi ta kumpi David ahi hi. David ta Solomon, Uriah’ zi Bathsheba tawh a neih pen ahi hi.

⁷ Solomon ta Rehoboam, Rehoboam ta Abijah, Abijah ta Asa,

⁸ Asa ta Jehoshafat, Jehoshafat ta Joram, Joram ta Uzziah,

⁹ Uzziah ta Jotham, Jotham ta Ahaz, Ahaz ta Hezekiah,

¹⁰ Hezekiah ta Manasseh, Manasseh ta Amon, Amon ta Josiah,

¹¹ Josiah ta Jekhoniah le a sanggamte hi a, Babylon gamah Israel mite salin a kipaipih hun pawlin a suak ahi uh hi.

¹² Jekhoniah ta Shealtiel, Shealtiel ta Zerubbabel,

¹³ Zerubbabel ta Abiud, Abiud ta Eliakim, Eliakim ta Azor,

¹⁴ Azor ta Zadok, Zadok ta Akhim, Akhim ta Eliud,

¹⁵ Eliud ta Eleazer, Eleazer ta Matthan, Matthan ta Jakob,

¹⁶ Jakob ta Josef hi a, Josef pen Khrih a kici Jesuh’ nu Mary’ pasal ahi hi.

¹⁷ Hih bang ahih manin Abraham panin David ciang dong khang sawm le li pha a, David panin Babylon gamah salin a kipaikhiatpih dong khang sawm le li mah pha a, Babylon gamah salin a kipaikhiatpih a kipanin Khrih a suah hun ciang dong khang sawm le li mah a pha hi.

Jesuh Khrih A Suahna Thu

¹⁸ Jesuh Khrih a hong suahna zia hih bang ahi hi. Mary pen Josef a dingin zuthawl piaksa hi a, ahi zongin a kiten taktak ma-un Kha Siangtho in amah a gaisakna thu Mary in a thei hi.

¹⁹ A lawmpa Josef pen a manin a gamta nuam mi khat ahih manin a lawmnu maizumsak nuam lo a, kuama theih lohin maksim dingin a ngaihsun hi.

²⁰ Ahi zongin hih bangin thu a ngaihsut laitakin a mang sungah Topa’ vantungmi khat hong kilang a, “David suan Josef aw, Mary sunga nau pen Kha Siangtho in a gaisak ahih manin amah tenpih ngamlah kei in.

²¹ Amah in tapa khat hong nei ding a, tua tapa in ama mite a mawhna uh panin honkhia ding ahih manin ama min dingin Jesuh na phuak ding hi,” ci-in thu a gen hi.

²² Topa in kamsangpa tungtawnin a gensa thu a tun theih nadingin hih thute a piang ahi hi. Tua a genna-ah,

²³ “Nungak khat gai-in tapa khat nei ding a, ama min dingin Emmanuel kiphuak ding hi,” ci hi. Emmanuel a khiatna in, eite tawh Pasian hong omkhawm hi, a cihna ahi hi.

²⁴ Josef zong a khanlawh ciangin Topa’ vantungmi’ sawl bangin a zi a la hi.

²⁵ Ahi zongin tua tapa a suah hun dongin a zi luppih lo a, a suah ciangin a min dingin Jesuh a phuak hi.