Marka 7 - Tedim Bible

Khanglui Ngeina

¹ Tua laitakin Jerusalem panin a hong pai Farisi mite le Thukham hilh siate, Jesuh kiangah hong kikhawm uh hi.

² A nungzuite pawlkhat in khanglui ngeina zui loin, khut silloin an a neklam uh a mukha uh hi.

³ (Farisi mite le Jew mite khempeuh in khanglui ngeina zui-in khut silloin an ne lo uh hi.

⁴ Nektheih zuakna panin a kilei nate zong amau teek mah in a sawp kei uhleh ne lo uh hi. Khanglui ngeina a zuih uh, hai khawng, beel khawng, sumngo kibawl beellekuang khawngte sawp ding cih ngeina a zuih uh tampi om hi.)

⁵ Tua ahih manin Farisi mite le Thukham hilh siate in Jesuh kiangah, “Bang hangin na nungzuite in, khanglui laipek panin tuni dongin a kizui pulepa ngeinate zui loin, khut silloin an ne ahi uh hiam?” ci-in a dong uh hi.

⁶ Jesuh in amaute dawng a, “A tungthama a hoihin a kilangkhem note’ thu, Isaiah in a genkholhna man mahmah hi. Ama genna-ah, ‘Pasian in hih bangin gen hi: Hih mite in a kampi bek uh tawh kei hong zahtakbawl uh a, a lungsim taktak uh kei tawh kigamla hi.

⁷ Mihingte’ bawltawm thukhamte, Pasian’ thukham zahin mite tungah hilh uh ahih manin, kei hong biak hangun a kimanna om lo hi,’ ci hi.

⁸ Note in Pasian’ thukham nawlkhinin, mihingte’ thuhilhna na zui zawsop uh hi,” a ci hi.

⁹ Tua ciangin Jesuh in a thugen zomlai a, “Na khanglui ngeina uh na zuihtheih nadingun Pasian’ thukhamte a nawlkhinzia na siam mahmah uh hi.

¹⁰ Moses in, ‘Na nu le na pa zahtak un. A nu a pa a samsiate kithat hen,’ ci hi.

¹¹ Ahi zongin note in, ‘Mi khatpeuh in a nu a pa a piaktheih ding na khat peuhpeuh a neih hangin, hih pen korban (Pasian a’ ding) hi, ci peuh leh,

¹² a nu le a pa a huh nading panin suakta thei hi,’ ci-in thu na hilh uh hi.

¹³ Hih bang danin mite thu na hilhna uh tawh Pasian’ thu na pampaih uh hi. Hih bangzia-in na gamtatna uh adang tampi zong omlai hi,” a ci hi.

Mi Hong Ninsak Thei Nate

¹⁴ Tua ciangin Jesuh in mihonpite samin amaute kiangah, “Mi khempeuh aw, ka thugen hong ngai unla, ka thugente theitel un.

¹⁵ A pualam panin mite sungah tumin mi a ninsakthei bangmah om lo hi. Ahi zongin mite sung panin a pusuak khiate in mi ninsakthei hi.

¹⁶ (Zak nading bil a neite in hih thu za ta un,” a ci hi.)

¹⁷ Mihonpite nusia-in inn sungah a lut khit ciangin a nungzuite in hih thugentehna thu a dong uh hi.

¹⁸ Jesuh in, “Note in zong bangmah a thei lo himawk hi lo na hi uh hiam? A pualam panin mite sungah a tum nate in mi ninsak thei lo hi.

¹⁹ A lungsimah tum loin a gil sung bekah tum ahih manin tua panin kithakhia lel hi. (Hih bang a gen ciangin an khempeuh nek dingin a siangtho ahi hi, ci-in Jesuh in a gen ahi hi.)

²⁰ Mihingte sung panin a pusuak khiate in mihing ninsak hi.

²¹ Bang hang hiam cih leh mihingte’ lungsim sung panin nungak-tangval mawhnopna, guktakna, mi thahna, zilepasal neisate tawh mawhnopna,

²² huaihamna, gitlohna, khemna, gamtat hoih lohna, enna, mi gensiatna, kisialhna, le haitatna a piangsakthei ngaihsutna hoih lote khempeuh,

²³ mihingte sung panin pusuakin mite ninsak ahihlam thei lo na hi uh hiam?” a ci hi.

Syria gam Foenisia khuami Numei’ Upna

²⁴ Tua lai panin Jesuh dingkhia-in Taia khuakiim gamah a pai hi. Inn khat sungah lut a, kuamah in a theih loh ding a ut hangin a busim thei kei hi.

²⁵ A tanu dawi a vei nupi khat in Jesuh’ thu a zak ciangin hong pai-in ama khe phungah hong bok hi.

²⁶ Tua nupi pen Grik mi hi a, Syria gam Foenisia khua-a a suak ahi hi. A tanu sung panin dawi a hawlkhiatsak nadingin a hong thum hi.

²⁷ Ahih hangin Jesuh in, “Naupangte an nesak masa ni. Naupangte’ nek ding kimlai ui khawite piak masak ding kilawm lo hi,” ci-in a dawng hi.

²⁸ Ahi zongin nupi in, “Hi mah hi, Topa aw; sabuai nuai-a uite in naupangte’ khamvalteng ngahbuang hi lo ahi hiam?” a cih ciangin,

²⁹ Jesuh in nupi kiangah, “Hih banga na kampauna hangin na inn-ah ciah ta in; na tanu sung panin dawi a paikhiazo hi,” a ci hi.

³⁰ Amah zong a inn-ah ciahpah a, a tanu nuamtakin lum hithiatin a om mu ahih manin dawi a paikhiat khitna thu a thei hi.

Jesuh in Bilngongin a Paumawl Mi khat Damsak

³¹ Tua ciangin Taia khuakiim gam panin Jesuh paikhia a, Sidon khuapi nawkin pai a, Khuapi Sawmte gam lam tawnin Galilee Tuili-ah a tung hi.

³² Mi pawlkhat in a bilngongin a pau thei lo mi khat, Jesuh kiangah hong paipih uh a, ama tungah a khut a ngaksak nadingin a thum uh hi.

³³ Jesuh in zong mihonte omna panin tua mipa paikhiatpih a, a mipa’ bil tegel sungah a khutmete guang a, tua ciangin a khutmete cil nuhin a leii lawnsakin

³⁴ vantung lam ento a, khuisa-in, “Kihong in,” a cihnopna ahi “Effatha” a ci hi.

³⁵ Thakhatin a mipa’ bil kihongin, a leii zong hong kol a, nuamtakin a pauthei hi.

³⁶ Kuama kiangah hih thute a gen loh nadingun Jesuh in kham a, ahi zongin nakkham le nakgen semsem zawsop uh hi.

³⁷ Amaute in genzawh loh dongin lamdangsa mahmah uh a, “Hih mipa in septheih loh bangmah nei lo hi. Bilngongte nangawn khua zasak thei a, a pau thei lote nangawn pau theisak hi,” a ci uh hi.