Marka 11 - Tedim Bible

Gualzawhna tawh Jerusalem-a Lutna

¹ Jerusalem khuanai, Bethfage le Bethany khuaneute a omna Oliv Mual a tun uh ciangin Jesuh in a nungzuite nih ma sawl a,

² “Mai-a om khua-ah va pai un. Khua na tun phetun, kuamah a tuan ngei nai lohna lano khat khau a kikhih na mu ding uh hi. Hong sut unla hong kai un.

³ Mi khatpeuh in, ‘Bang hangin tua la khau sut na hi uh hiam?’ hong cih leh, ‘Topa in deih hi; hih lai mahah kong kaikikpah ding uh hi,’ ci-in gen un,” a ci hi.

⁴ Amau tegel zong paipah uh a, kongzing a kong gei khatah lano a kikhih khat mu uh ahih manin a khau a sutpah uh hi.

⁵ Tua kiima om mite in, “Bang hangin tua lano khau sut na hi uh hiam?” ci-in a dot uh ciangin,

⁶ Jesuh’ vaikhak thuteng gen uh a, bangmah cih nawn lo uh hi.

⁷ Jesuh kiangah a lano tunpih uh a, a lano tungah a puan uh phahin a tungah Jesuh a tuang hi.

⁸ Mi tampite in ama pai nading lampi-ah a puan uh na phah uh a, mi pawlkhat in lolai panin a sat uh sawlpangte na phah uh hi.

⁹ Jesuh’ mai-a a pai mite le a nunga a zui mite in, “Pasian phat un! Topa’ tangin a hong pai mipa, Pasian in thupha pia ta hen!

¹⁰ A hong tung ding i pu David’ ukna, Pasian in thupha pia ta hen! Pasian phat un!” ci-in a awng uh hi.

¹¹ Tua bangin Jerusalem khua sungah Jesuh lut a, biakinn sungah pai-in na khempeuh a en kawikawi hi. Tua ciangin ni niam khinta ahih manin sawm le nihte tawh Bethany khua-ah a pai hi.

Theikung A Kisamsiatna

¹² A zing ciangin Bethany khua pan paikhia uh a, Jesuh a gil a kial hi.

¹³ A teh a no theikung khat galmuh ahih manin a gahkhak leh ci-in a lo dingin a va pai hi. Thei min hun hi lo ahih manin, a phung a tun ciangin a teh simloh bangmah na om lo hi.

¹⁴ Tua ciangin theikung kiangah, “Nang tung panin kuamah in theigah loin ne nawn kei ta hen,” a ci hi. Hih thu, a nungzuite in a za uh hi.

Biakinn Siansakna

¹⁵ Jerusalem khua a tun uh ciangin, biakinn huang sungah Jesuh lutin tua sungah sumzuak sumlei-a a omte hawlkhiat ding kipan a, sumkhekte’ sabuaite lumlet sakin, vakhu zuakte’ tutphahte sawnpaih sak hi.

¹⁶ Biakinn huang sungah kuamah bangmah paipihsak lo hi.

¹⁷ Tua ciangin mite kiangah thu hilh a, “Ka inn pen mi khempeuh a dingin thungetna inn kici ding hi,” ci-in Pasian in a genna thu Lai Siangtho sungah kigelh hi lo ahi hiam? Ahi zongin note in guta buluhte’ bukna mun na suaksak uh hi, ci-in thu a hilh hi.

¹⁸ Siampi liante le Thukham hilh siate in hih thu a zak uh ciangin Jesuh a thahtheih nading uh lampi a zong uh hi. Ahi zongin mihonpi in ama thuhilhna lamdangsa uh ahih manin amaute in Jesuh a kihta uh hi.

¹⁹ A nitak ciangin khuapi panin Jesuh le a nungzuite a paikhia uh hi.

Theikung Si Pan Thuhilhna

²⁰ A zingsang ciangin tua lampi mah zui-in a paikik ciangun tua theikung a zung dongin a sihna a mu uh hi.

²¹ Peter in a thu phawk ahih manin, “Sia aw, na theikung samsiat a sita hi,” a ci hi.

²² Jesuh in amaute kiangah, “Upna nei un.

²³ Upna na neih nak-uhleh hih mual kiangah, ‘Na omna panin paikhia-in tuipi sung kidenna in,’ ci le-uhcin, na lungsim sung uhah uplahna om loin na gen bangun piang taktak ding hi, ci-in na up nak-uhleh, na cih bangun hong piang ding hi.

²⁴ Tua ahih manin note kiangah kong genin-ah: Na khat peuhpeuh na nget uh ciangin ngah ding ci-in um un; tua hileh na nget peuhpeuh uh na ngah ding uh hi.

²⁵ Thungen dingin na din uh ciangin midang tungah na hehna uh a om khat peuhpeuh maisak un; tua hileh vantungah a om na Pa un note’ mawhna hong maisak ding hi.

²⁶ (Midangte’ mawhna na maisak kei uhleh vantungah a om na Pa un note’ mawhna zong hong maisak lo ding hi,” ci-in a dawng hi.)

Jesuh’ Aana Neihna Kidong

²⁷ Tua ciangin Jerusalem tungkik leuleu uh hi. Biakinn kiimah Jesuh a vak kawikawi laitakin siampi liante, Thukham hilh siate, le upate hong pai uh a,

²⁸ “Hih nate, kua’ thu tawh bawl a, na bawl nadingin kua in aana hong pia ahi hiam?” ci-in a dot uh ciangin

²⁹ Jesuh in, “Keimah in note tungah thu khat kong dong masa ding hi; nong dawn uhleh kei zong kua thu tawh ka bawl, cih kong gen ding hi.

³⁰ Johan in tui a phumtheih nading thu Pasian kiang panin a ngah ahi hiam, ahih kei leh mihingte tung panin a ngah ahi hiam, hong gen un,” a ci hi.

³¹ Tua ciangin amaute khatlekhat kikum uh a, “Pasian kiang pan hi,” ci lehang, “Tua ahihleh bang hangin Johan’ thu um lo na hi uh hiam?” hong ci ding a,

³² “Mihingte’ tung pan hi,” cih ding lah, mi khempeuh in Johan pen kamsang taktakin ngaihsun uh ahih manin mite i kihta zel hi, a ci uh hi.

³³ Tua ahih ciangin, “Ka thei kei uh hi,” ci-in a dawng uh hi. Jesuh in zong, “Hih nate kua thu tawh ka bawl cih thu kei zong kong gen kei ding hi,” a ci hi.