Mangmuhna 9 - Tedim Bible

¹ Tua ciangin a ngana vantungmi in a peengkul hong tum a, vantung panin leitungah aksi khat a leengsuk ka mu hi. Tua aksi tungah kuahawm thukpi honna tawhtang a kipia hi.

² Amah in tua kuahawm thukpi a hon ciangin meiphualpi panin meikhu bangin meikhu tampi hong pusuak a, tua meikhu hangin ni mialin khim a zing hi.

³ Tua meikhu sung panin kauphete hong pusuakin leitungah pai uh a, momaite’ neih bangin a gupha mahmah amaute tungah a kipia hi.

⁴ Amaute in lopate, singkungte a kipan a hing khat peuhpeuh bangmah cih loin, a taltang uhah Pasian’ ciaptehna a om lo mite bek a gimsak nadingun thu a kipia hi.

⁵ Amaute in tua bang mite that loin kha nga sung a bawlsiat nading uh thu kipia a, amaute’ bawlsiatna pen momai in mi a deh ciangin a na tawh kibangin a na velval ahi hi.

⁶ Tua hun ciangin mite in a sihtheih nading uh a zonzon uh hangin sihtheih nading lampi mu lo ding uh a, sinuam mahmah napi-un sithei het lo ding uh hi.

⁷ Tua kauphete’ pianzia pen galsim dingin a kithawi sakolte tawh kibang uh hi. A lu tung uhah kham lukhu tawh a kibang khu uh a, a maitang uh mihing maitang tawh a kibang hi.

⁸ A sam uh numei sam tawh kibang a, a ha uh humpinelkai ha tawh a kibang hi.

⁹ A awm uh, sik-awmdal tawh a kibang pian in tuam a, a khazap uh a gingte pen galkido laitakin sakol in a kaih leeng tampite’ gin’ tawh a kibang hi.

¹⁰ Momai bangin mei nei-in mi dehthei uh a, tua a mei uh tawh mihingte kha nga sung gimsak theih nading gu a nei uh hi.

¹¹ Amaute in tua kuahawm thukpi a uk vantungmi pen kumpi-in nei uh a, tua vantungmi a min pen Hebru pau-in Abaddon hi a, Grik pau-in Apollion hi a, “A Susia pa,” a cihnopna ahi hi.

¹² Tu-in gimna khatna a beina hita a, ahi zongin gimna nam nih hong tung lai ding a om hi.

¹³ Tua ciangin a gukna vantungmi in a peengkul hong tum a, Pasian’ mai-ah a om kham kibawl biakna tau kiu lite panin awging khat ka za hi.

¹⁴ Tua awging in peengkul a tawi vantungmi a gukna kiangah, “Eufratis Gun lianpi-ah a kihencip vantungmi lite khahkhia in,” a ci hi.

¹⁵ Tua ahih manin leitung mi khempeuh sehthumsuah sehkhat a thah ding uh a kum, a kha, a ni, a nai hun ngakin a kigingsa-in a om tua vantungmi lite a kikhahkhia hi.

¹⁶ Mi a that ding sakol tung tuang galkap mak sawmnih pha hi, ci-in hong kigen hi.

¹⁷ Ka maang sungah ka muh sakolte le a tungah a tuangte pen hih bang ahi hi: Sakol tung tuangte in mei bangin a san, sapfaia suangmanpha bangin a dum, kat bangin a eng, awmdal a bulh uh hi. A sakol lutangte pen humpinelkai lutang tawh kibang a, a kam uh panin meikuang, meikhu, le kat a pusuak hi.

¹⁸ Hih sakolte’ kam panin a hong pusuak meikuang, meikhu, le kat, hih gimna nam thumte in leitung mi sehthumsuah sehkhat a sisak hi.

¹⁹ Hih sakolte in a kam le a mei uhah gu nei uh a, a meite un gul tawh kibangin lutang nei ahih manin a meite uh tawh mi a liamsak uh hi.

²⁰ Hih gimna tawh a si lo midangte pen amau’ gamtatnasa panin kikhelkik nuam lo uh hi. Dawi a biaknate uh, khua a mu thei lo, khua a za thei lo, lam a pai thei lo ngun, kham, sumngo, suang, le sing a kibawl milim a biakte uh khawl tuan lo uh hi.

²¹ A mi thahna, a aisanna, a paktatna, le a guktaknate uh zong khawl tuan lo uh hi.