Mangmuhna 5 - Tedim Bible

Laizial le Tuuno

¹ Tua ciangin, tokhom tungah a tupa in a taklam khutah a tawi laizial tawn khat ka mu hi. Tua a laidal tung a langnih tuakah lai kigelhin a kizialcip khit ciangin a kiphel theih loh nadingin mun sagih-ah kiciamteh hi.

² Tua ciangin a thahat vantungmi khat ka mu a, amah in nakpitakin, “Hih laizial a ciamtehnate lakhia-in a laizial a phel dingin a kilawm kua om ahi hiam?” hong ci hi.

³ Ahi zongin tua laizial a phel ding mi, vantung, leitung, leinuai-ah kuamah kimu lo hi.

⁴ Tua laizial phelin a sung a en dingin a kilawm kuamah kimu lo ahih manin nakpitakin ka kap hi.

⁵ Tua laitakin upate khat in kei kiangah, “Kap kei in. Judah minam sung panin Humpinelkai, David suan sung panin a lianpa gualzo khinta a, tua laizial ciaptehna sagihte lakhia-in a laizial phelthei ding hi,” a hong ci hi.

⁶ Tua upate’ huamsung, ganhing lite le kumpi tokhom kikalah Tuuno a ding ka mu hi. Tua Tuuno pen a kigo lumsa tawh kibang a, leitung khempeuhah a kisawlkhia, Pasian’ khate’ lim ahi ki sagih le mittang sagih a nei hi.

⁷ Tua Tuuno va pai a, tokhom tungah a tupa in a taklamah a tawi laizial a va la hi.

⁸ Tua laizial a lak khit ciangin ganhing lite le upa sawmnih le lite, Topa’ mai-ah a kun uh hi. Amaute in harp lasakna khat ciat le Pasian’ mi siangthote in thungetna-in a zat uh paknamtui a dimin a om paknamtui beel khat ciat a tawi uh hi.

⁹ Amaute inla thak khat sa uh a, “Nang Tuuno, tua laizial a lakhia ding le a ciamtehnate a lakhia dingin na kilawm hi. Nang hong kigo khin ahih manin mi namkim le pau namkim a pau mite sung panin na sisan tawh Pasian a dingin mite na lei khin a,

¹⁰ Pasian’ na a sem dingin siampi za le kumpi za na pia a, amaute in leitung ukin a om ding uh hi,” a ci uh hi.

¹¹ Tua ciangin ka khuadak leh tokhom le ganhing lite le upate’ kimkotah atul-amakin a ding miaimuai vantung mite’ awging ka za hi.

¹² Amaute in nakpitakin la sa uh a, “A kigo Tuuno in vangliatna le hauhna, pilna le thahatna, pahtawina, minthanna, le phatna, a ngah dingin kilawm hi,” a ci uh hi.

¹³ Tua ciangin vantung, leitung, leinuai, tuipi sung le mun khempeuhah a om nuntakna a nei khempeuh inla a sakna uh ka za a, amaute in, “Tokhom tungah a tupa le Tuuno in phatna, pahtawina, minthanna le vangliatna, ngah tawntung ta hen,” a ci uh hi.

¹⁴ Tua ciangin ganhing lite in zong, “Amen,” na ci uh a, upate in zong khukdinin Pasian a bia uh hi.