Mangmuhna 22 - Tedim Bible

¹ Tua ciangin vantungmi in Pasian le Tuuno tokhom panin a hong luangkhia, kristal suangmanpha bangin a tee selsel gun tui hong lak a,

² khuapi sung lampi laizangah a luang hi. Tua gun pang tuakah nuntakna singkung po a, kha simin gah ahih manin kum khat sungin sawm le nih vei a gah hi. A tehte zong natna dam nading zatui-in kizang hi.

³ Pasian’ samsiatna a ngah peuhpeuh tua khua sungah om lo hi. Tua khuapi sungah Pasian le Tuuno’ tokhom om ding a, ama nasemte in amah a bia ding uh hi.

⁴ Amaute in ama maitang mu ding uh a, a taltang tung uhah ama min kigelh ding hi.

⁵ Topa Pasian pen amaute’ khuavak hi-in, a tawntungin amaute in uk paisuak ding uh ahih manin khuamial hun cih om nawn lo ding a, khua a vaksak ding meivak le nitaang cihte kisam lo ding uh hi.

Jesuh Hong Pai Baih Ding

⁶ Tua ciangin vantungmi in kei kiangah, “Hih thute muantaak a, thuman ahi hi. Kamsangte tungah a Kha Siangtho a pia Topa Pasian in a hong piang baih ding thute, a nasemte tungah a lak dingin a vantung mite a hong sawl hi,” hong ci hi.

⁷ Jesuh in, “Kei a hong pai baihta ding ka hi hi. Hih laibu sunga kigelh thu a zui mite mi hampha ahi hi,” a hong ci hi.

⁸ Keimah Johan in hih thute za-in ka muh ahi hi. Hih thute za-in ka muh ciangin hih thute kei tungah a hong lak vantungmi a bia dingin a khe phungah ka boksuk hi.

⁹ Ahi zongin amah in, “Kei hong bia kei in. Kei pen nang le na sanggamte, le hih laibu sungah a om thu a zui mite tawh nasemkhawm khat ka hi hi. Pasian bia in,” hong ci hi.

¹⁰ Tua ciangin vantungmi in kei kiangah, “Hih laibu sungah a kigelh thute a tun ding hong naita ahih manin imcip kei in.

¹¹ A gilo mite gilo lailai hen la, a kihhuai gamtatte kihhuai gamtat lailai hen la, a hoih gamtatte hoih gamtat lailai hen la, a siangtho mite a siangtho mah hi lailai ta hen!” hong ci hi.

¹² Tua ciangin Jesuh in, “Kei ka hong pai baihta ding a, mi khempeuh a gamtatna uh tawh kizui-in a thaman ding uh ka hong puak ding hi.

¹³ Kei pen a masa le a nunung, a kipatna le a tawpna a cihnopna ahi Alfa le Omega ka hi hi,” a hong ci hi.

¹⁴ Khuapi kulhkongpi sungah a luttheih nading le nuntakna singgah a nektheih nadingun a puan uh a siangin a sawp mite, mi hampha ahi uh hi.

¹⁵ Ahi zongin a lampial mite, aisan mite, a paktat mite, mi thatte, milim biate, le zuaugen nuamsa-in zuau a gengen mite, khuapi pualamah a om uh hi.

¹⁶ “Keimah Jesuh in pawlpite a dingin hih thute nang kiangah a hong gen dingin ka vantungmi ka hong sawl hi. Kei pen David’ zung le a suan ahi, zingsol ka hi hi,” a hong ci hi.

¹⁷ Kha Siangtho le Mothak in Jesuh kiangah, “Hong pai in,” a ci uh hi. Hih thu a za mi khempeuh in zong Jesuh aw, “Hong pai in,” ci ta uh hen. A dangtak mi khempeuh hong pai uh hen la, a deih khempeuh in nuntakna tui a khongin hong la ta uh hen.

¹⁸ Keimah Johan in hih laibu sungah a kigelh thu a za mi khempeuh ka hong hilhkholh nopna panin: A thu a behlap na om uhleh Pasian in zong hih laibu sungah a kigelh gimnate note tungah hong behlap ding a,

¹⁹ hih laibu sungah a kigelh thute a hemkhia na om uhleh Pasian in zong hih laibu sungah a kigelh nuntakna singgah le Khuapi Siangtho sungah na ngah ding uh hamphatnate note kiang panin hong hepkhiatsak ding hi.

²⁰ Hih thu khempeuh hong genin teci a pang mipa in, “Ka hong pai baih taktak ding hi,” hong ci hi. Na cih bangin hi ta peuh hen. Topa Jesuh aw, hong pai ta in!

²¹ Topa Jesuh hong hehpihna thupha, note khempeuh tungah hong om tahen. Amen.