Malakhi 3 - Tedim Bible

¹ Hih bangin na thugenna uh tawh kisai-in Vanglian Topa in hong dawng a, “Ka pai nading lampi a bawlkhol dingin ka kamtai pa ka sawl ding hi. Tua ciangin na ngakngak uh Topa a biakinn sungah thakhat thu-in hong pai ding hi. Na muhnop uh kamtai pa hong pai-in ka thuciamna hong taangko ding hi,” ci hi.

² Ahi zongin ama hong pai ni ciangin kua in thuakzo ding a, amah hong kilaak ciangin kua nungtazo ding ahi hiam? Amah pen, sikte a siangthosak mei, le puante a siangthosak satpiang tawh kibang hi.

³ A ninte kangtumsakin, ngunte a siangsak pa bangin thukhen dingin hong pai ding hi. Ngun le khamte a kisiansak bangin amah in Levi suanlekhak ahi siampite siangsak ding hi. Tua ciangin Topa’ tungah a kilawm biakna a pia ding uh hi.

⁴ Tua ciangin Judah mite le Jerusalem mite’ piak biaknate pen nidang ate mah bangin Topa’ mai-ah a lungkimhuai hi ding hi.

⁵ Vanglian Topa in hih bangin ci hi: “Note tungah thukhen dingin ka hong pai ding hi; ai tawite, numei tawh a mawhte, a man lopi a teci pangte, numeite’ thaman piakna-ah khemna a zangte; meigong, tagah, le gamdang mite a zawhthawh bawlte, le kei hong zahtak lo mi khempeuhte’ langkhatah thakhatin teci pangin thu ka khen ding hi.

Sawm-ah-khat Piakna

⁶ “Kei, Topa ka hi a, lungsim a kheel lo mi ka hi hi. No Jakob suanlekhakte aw, a siacimit na hi nai kei uh hi.

⁷ Na pu na pate uh mah bangin ka thukhamte panin note na pialkhia uh a, ka thukhamte na zui kei uh hi. Ahi zongin keima lamah hong kihei kik un; kei zong note lamah kong kihei ding hi. Ahi zongin note in, ‘Nang lamah hong bangci kihei ding ka hi uh hiam?’ na ci uh hi.

⁸ Keimah in note kong dotnop thu pen, mi khatpeuh in Pasian’ na guksak ding kilawm ahi hiam? Kilawm lo hinapi-in note in nong guksak uh hi. Ahi zongin note in, ‘Bang hong guksak ka hi uh hiam?’ na ci uh hi. Sawm-ah-khat piakna le biakpiaknate ah nong guksak uh hi.

⁹ Na minam bupun keima neihsa hong guksak na hih manun note khempeuh tungah samsiatna hong tung hi.

¹⁰ Ka biakinn-ah an a om theih nadingin sawm-ah-khat a kimin hong paipih un. Kei hong ze-et un; vantung kongkhakte hongin, note a dingin na hoih tampi kong piakna na mu ding uh hi.

¹¹ Lo panin a piang na ante uh, kauphe ka nesak nawn kei ding a, na leenggui uh gahpha mahmah ding hi.

¹² Tua ciangin na gam uh, ten nadingin a hoih mahmah leitang hong suak ding ahih manin, minam dang khempeuh in note pen a nuamsa minam hong ci ding uh hi,” a ci hi.

Midikte le Migilote A Kilamdanna

¹³ Topa in hih bangin ci hi: “Kei tawh kisai-in na kampaunate uh khauh mahmah hi. Note in, ‘Bang kam pau ka hi uh hiam?’ na ci uh hi.

¹⁴ Note in, ‘Pasian’ na i sep a mawkna hi. Ama hong sawl bangin i sep hangin bang a kimanna om a, i gamtatnasate hangin i dahna lim, Vanglian Topa’ mai-ah i lah hangin bang phattuamna om ahi hiam?

¹⁵ I muhna bang leh, mi kiphasakteng mah in thupha ngahin nuamsa uh hi. Mi gamtatsiate ahihleh citheibek loin, a gamtatsiatnate uh tawh Pasian ze-et napi-un bangmah tuak se lo uh hi,’ na ci uh hi,” a ci hi.

¹⁶ Topa a zahtak mite khatlekhat tua bangin thu kigen uh a, amaute’ thugennate, Topa in ngai-in za hi. Topa in laibu khat nei a, amah zahtakin a thupi ngaihsut mite khempeuh tua sungah kiciamteh hi.

¹⁷ Vanglian Topa in hih bangin ci hi: “Tua a kiciamteh mite pen keima mite hi ding uh hi. Keimah in na ka sep ni ciangin amaute pen keima neihtuam taktak mite hi ding uh hi. Pa in ama thu a mang a tapa a hehpih mah bangin kei zong amaute ka hehpih ding hi.

¹⁸ Tua ciangin midikte le migilote, le keima na hong semte le hong sem lote a kilamdanna na mukik ding uh hi,” a ci hi.