Luka 4 - Tedim Bible

Jesuh A Kize-etna

¹ Kha Siangtho tawh a kidimin Jordan gun panin Jesuh hong ciahkik a, Kha Siangtho in gamlakah paipihin,

² Dawimangpa in ni sawmli sung a ze-et hi. Tua hun sung Jesuh in bangmah ne lo a, tua ze-etna hun a bei ciangin a gil kial mahmah hi.

³ Dawimangpa in Jesuh kiangah, “Pasian’ Tapa na hih takpi leh hih suang anlum suaksak in,” a ci hi.

⁴ Jesuh in, “Lai Siangtho sungah, ‘Anlum bek tawh mite nungta zo lo hi,’ ci-in kigelh hi lo ahi hiam?” ci-in a dawng hi.

⁵ Tua ciangin Dawimangpa in Jesuh paipihto a, thakhat thu-in leitung kumpi gam khempeuh a lah khit ciangin,

⁶ “Hihte khempeuh keima tungah hong kipia khin ahih manin, ka piaknop peuhpeuh tungah ka pia thei hi. Hih vangliatna le hauhnate khempeuh nangma tungah kong pia ding hi.

⁷ Keima mai-ah kunin hong bia lecin hihte khempeuh nangma a’ hi ding hi,” a cih ciangin

⁸ Jesuh in, “Lai Siangtho in, ‘Topa Pasian na bia inla, ama na bek sem in,’ ci hi lo ahi hiam?” ci-in a dawng hi.

⁹ Tua ciangin Dawimangpa in gamlak panin Jerusalem khua-ah Jesuh paipih a, biakinn khumzang a sangpenna munah a kahtohpih khit ciangin, “Pasian’ Tapa taktak na hih leh hih lai panin tuaksuk in.

¹⁰ Bang hang hiam cih leh Lai Siangtho in, ‘Pasian in nang a hong kem dingin a vantung mite hong sawl ding hi,’ ci-in a gen banah,

¹¹ ‘Na khete nangawn suang tawh kitatin a liam khak loh nadingin vantung mite in a khut uh tawh nang hong dom ding uh hi,’ zong ci lai hi,” a cih ciangin

¹² Jesuh in, “Lai Siangtho in, ‘Topa na Pasian na ze-et kei in,’ ci hi,” ci-in a dawng hi.

¹³ Dawimangpa in a hihtheihna khempeuhah Jesuh a ze-et khit ciangin tawlkhat sung a nusia phot hi.

Jesuh in A Nasep Galilee Gamah Kipan

¹⁴ Tua ciangin Kha Siangtho vangliatna tawh a kidimin Galilee gamah Jesuh a ciahkik hi. Tua kiima om gam khempeuhah ama thu kizakim hi.

¹⁵ Jesuh in amaute’ kikhopna innte-ah thu hilh a, mi khempeuh in amah a phatkim uh hi.

Nazareth Khua-ah Jesuh Kisang lo

¹⁶ Tua ciangin ama khanna Nazareth khua-ah Jesuh pai a, Sabbath ni ciangin a paingei bangin kikhopna inn-ah a pai hi. Lai Siangtho a sim dingin amah ding a,

¹⁷ a nget bangin a sim dingin kamsang Isaiah Lai Siangtho bu a kipia hi. A laibu lemin a simnopna mun a zon ciangin a nuai-a bangin a kigelhna mun mu-in a sim hi. Tua munah,

¹⁸ “Gimna a thuak mite tungah Lungdamna Thu a hilh dingin Topa in kei hong sehkhin ahih manin keima sungah Topa’ kha hong om hi. Salin a kimante tungah suahtakna thu a gen ding, mittawte in khua a muhkik theih nading, a kinengniamte a suaktasak ding le

¹⁹ Topa in a mite a hotkhiat ding kum a pulak dingin kei hong sawl hi,” ci-in a kigelh hi.

²⁰ Hih thu a kigelhna munteng a simkhit ciangin a laibu khupin biakinn nasempa tungah pia kikin a tu hi. Kikhopna inn sungah a om mi khempeuh in limtakin amah a en uh hi.

²¹ Tua ciangin amaute tungah thugen ding kipan a, “Note’ zakin a hong kisim Lai Siangtho thu, tuni-in a hong tung hi,” a ci hi.

²² Amaute khempeuh in Jesuh thupi sa mahmah uh a, thugen siam sa mahmah uh ahih manin, “Hih pa, Josef’ tapa hi lel hi lo ahi hiam?” a ci uh hi.

²³ Tua ciangin Jesuh in amaute kiangah, “Paunak khatah, ‘Zato pa aw, nangmah kidamsak tawm in,’ a cihna thu kei tungah nong cihnop ding uh ka thei hi. ‘Kapernaum khua-ah na bawl thu ka zakte uh zong hih lai na khua-ah hong bawl in,’ zong nong cinuam ding uh hi,” a ci hi.

²⁴ Tua ciangin Jesuh in a thugen zomlai a, “Ke’n kong cihin-ah, kamsang a kuamah peuh ama khua-ah kipakta ngei lo hi.

²⁵ A taktakin ci lehang, Elijah’ hun lai-in kum thum le alang sung guah zu lo a, gam sung khempeuhah kialpi a tun hun laitakin Israel gam sungah meigong numei tampi tak om hi.

²⁶ Ahi zongin tua numei tampite khat beek kiangah Elijah kisawl lo a, Sidon gam Zarefath khua-a om meigongnu kiang bekah kisawl hi.

²⁷ Kamsang Elisha’ hun laitakin Israel gam sungah miphak tampi om a, ahi zongin kuamah in damna ngah loin, Syria mi Naaman bek in damna ngah hi,” a ci hi.

²⁸ Hih thu a zak uh ciangin kikhopna innsunga om mi khempeuh a heh mahmah uh hi.

²⁹ Amaute dingin khuanawlah Jesuh paipih uh a, khuanawl keenah a bungbu sawnkhiat dingin a paipih uh hi.

³⁰ Ahi zongin amaute’ lak nawkin Jesuh a paikhia hiau hi.

Dawivei Mipa

³¹ Tua ciangin Galilee gam Kapernaum khua-ah paisuk a, Sabbath ni-in thu a hilh hi.

³² Amah in aana neite bangin thu gen ahih manin amaute in lamdang a sa mahmah uh hi.

³³ Kikhopna inn sungah dawivei mi khat om a, nakpitakin kiko-in,

³⁴ “Nazareth khuami Jesuh aw, kote tawh bang kisai ihi hiam? Kote a susia dingin hong pai na hi hiam? Pasian’ mi siangtho na hih lamtak ka hong thei uh hi,” a ci hi.

³⁵ Jesuh in tua dawi taii a, “Pau kei inla, ama sung panin paikhia in,” ci-in thu a pia hi. Dawi in a mipa mihon lakah a puksak khit ciangin ama sung panin paikhia a, ahi zongin liamsak lo hi.

³⁶ Kikhopna innsunga a om mi khempeuh in lamdangsa mahmah uh a, “Hih a kampaute a bangci kampau ahi hiam? Aana le vang neihna tawh dawi thu pia a, dawite a taikhia uh hi,” a ci uh hi.

³⁷ Hih Jesuh’ thu tua gam mun khempeuhah a kiza hi.

Jesuh in Peter’ Sungnu Damsak

³⁸ Kikhopna inn panin Jesuh paikhia-in Simon’ inn-ah a lut hi. Simon’ sungnu nattunin na gim mahmah a, hih ama natna thu Jesuh kiangah a gensak uh hi.

³⁹ Jesuh zong pai-in a lupna gei-ah ding a, a cinatna a taii ciangin a nattutna dampah a, amah zong thozo pahin a zinte a dozo pah hi.

Jesuh in Nitakin Mi Tampi Damsak

⁴⁰ Ni a tumkhit ciangin natna tuamtuam a nei mi khempeuh Jesuh kiangah hong paipih uh a, Jesuh in amaute khempeuh tungah a khut nga-in a damsak hi.

⁴¹ Mi tampi sung panin dawite zong taikhia uh a, “Nang pen Pasian’ Tapa na hi hi,” ci-in a kiko uh hi. Amah pen Khrih ahihlam thei uh ahih manin amaute taii-in pausak lo hi.

Thuhilh a Khualzin dingin Jesuh Dingkhia

⁴² Khua a vak ciangin khuasung panin gamdaihna munah Jesuh a paikhia hi. Mite in amah zong uh a, a muh uh ciangin amah a taam lai nadingin a kho uh hi.

⁴³ Ahi zongin amah in, “Pasian’ Ukna hangin Lungdamna Thu a hilh ding mahin a hong kisawl ahih manin khua dangte-ah zong ka va hilh ding hi,” a ci hi.

⁴⁴ Tua ahih manin Galilee gam sunga om kikhopna innte-ah thuhilhin a om hi.