Luka 20 - Tedim Bible

Jesuh’ Aana Neihna Kidong

¹ Nikhat, Jesuh in biakinntual sungah mite kiangah thu hilhin, Lungdamna Thu genin a om laitakin, siampi liante, Thukham hilh siate, le upate hong paikhawm uh a,

² Jesuh kiangah, “Kua’ thu tawh hih bangin gamta a, kua in thu hong pia ahi hiam, hong gen dih in,” ci-in a dot uh ciangin

³ Jesuh in, “Kei zong thu khat ka hong dong ding hi. Hong gen dih un.

⁴ Johan’ tuiphumna pen Pasian’ tung panin thu ngah ahi hiam, ahih kei leh mihing tung panin thu ngah ahi hiam?” ci-in a dawng hi.

⁵ Tua ciangin amaute khatlekhat kikum uh a, “Pasian’ tung panin thu ngah hi,” ci lehang, “Bang hangin ama thu um lo na hi uh hiam?” hong ci ding a,

⁶ “Mihing tung panin a ngah hi,” ci leuleu lehang, Johan pen kamsang taktak hi, ci-in mi khempeuh in um uh ahih manin suang tawh hong denglum ding uh hi, a kici uh hi.

⁷ Tua ahih manin Johan’ tuiphumna pen kua thu tawh hiam, cih thei kei ung, ci-in a dawng uh hi.

⁸ Tua ciangin Jesuh in amaute kiangah, “Hih bangin ka nasepnate kua’ thu tawh ka sep hiam cih kei zong kong gen kei ding hi,” a ci hi.

Leenggah Lo le A Khote Thugentehna

⁹ Tua ciangin Jesuh in mite kiangah thugentehna khat gen a, “Mi khat in lo zuanin leenggui suan a, lo khawhlawhte khawhlawh sakin, amah gam dangah pai-in sauveipi a tam hi.

¹⁰ Leenggah min hun a tun ciangin ama ngahzah tang ding a va la dingin lo khawhlawhte kiangah a nasemte khat a sawl hi. Ahi zongin lo khawhlawhte in amah na satgawp uh a, khut hawmguakin a ciahsak uh hi.

¹¹ Tua ciangin nasem dang khat sawl leuleu a, lo khawhlawhte in tua pa zong na satgawpin maizumsak gawp uh a, khut hawmguak mahin a ciahsak uh hi.

¹² Tua ciangin a thumveina dongin a nasem dang khat mah sawl leuleu a, lo khawhlawhte in amah zong na liamsak gawpin na sawnkhia uh hi.

¹³ Tua ciangin leenggah lonei pa in, ‘Bang cih ding ka hi hiam? Ka it mahmah ka tapa ka sawl ding hi. Amaute in amah na zahtakbawl kha ding uh hi,’ a ci hi.

¹⁴ Ahi zongin lo khawhlawhte in a tapa a muh uh ciangin khatlekhat in, ‘Hih pa, a gamhluah ding pa ahi hi. Ama gamhluah ding teng i ngahtheih nadingin amah that ni,’ a ci uh hi.

¹⁵ Tua ahih manin amaute in lo nawlah amah sawnkhia-in a that uh hi. “Tua ahihleh lonei pa in hih lo khawhlawhte bang cih ding ahi hiam?

¹⁶ Amah hong pai-in hih lo khawhlawhte that ding a, midangte khawhlawhsak ding hi,” a ci hi. Amaute in hih thu a zak uh ciangin, “Hih bangin piang kei ta peuh hen,” a ci uh hi.

¹⁷ Tua ciangin Jesuh in amaute enin, “‘Innlamte in a nilkhiat suang pen innkiu suang bulpi suak khinta hi,’ ci-in Lai Siangtho in a gen pen bang a cihnopna ahi hiam?

¹⁸ Tua suang tungah a kia mi khempeuh kizangawp ding a, mi khatpeuh tungah tua suang a kiat leh zong dengvuigawp ding hi,” a ci hi.

Sisar’ tungah Siah Piakna

¹⁹ Jesuh in hih thugentehna a gen pen amaute a cihnopna hi, ci-in Thukham hilh siate le siampi liante in thei uh ahih manin Jesuh manpah nuam uh hi; ahi zongin mihonte kihta uh ahih manin manpah ngam lo uh hi.

²⁰ Tua ahih manin a hunhoih ngakin vil gige uh a, ukna aana a neite’ khut sungah Jesuh a aptheih nadingun ama kampau tawh a mat nopna-un, lungsim takpi tawh thudong a va kineihkhem dingin mi pawlkhat thukan dingin a cial uh hi.

²¹ Hih thukante in Jesuh kiangah, “Sia aw, na thuhilhnate le na thugente man mahmah hi. Nang in miliante zahtakbawl tuan loin, Pasian’ thu a mantakin na hilhna ka thei uh hi.

²² Rom Kumpipa Sisar’ tungah siah i piak ding a kilawm mah ahi hiam, kilawm lo ahi hiam?” ci-in a dong uh hi.

²³ Ahi zongin Jesuh in amau’ ngianbawlna thei ahih manin,

²⁴ “Sum peek khat hong lak dih un. Hih sum tunga om lim le min kua-a’ ahi hiam?” a cih ciangin, “Kumpipa’ lim le min hi,” ci-in a dawng uh hi.

²⁵ Tua ciangin Jesuh in, “Tua ahihleh, Kumpipa a’ teng Kumpipa tungah na pia unla, Pasian a’ teng Pasian’ tungah na pia un,” a ci hi.

²⁶ Ama kampauna tawh mihon lak panin a mat nadingun thu om thei lo ahih manin ama thudawnna hangin lamdangsa-in a om khikhe uh hi.

Thawhkikna Thudotna

²⁷ Tua ciangin, “Thawhkikna om lo hi,” a ci mi pawlkhat Jesuh kiangah hong pai uh a,

²⁸ “Sia aw, Moses in eite a dingin ngeina khat hong koihsak a, ‘Mi khat in ta nei loin a zi a sihsan leh, tua a sipa’ khang a kizop theihna dingin a naupa in tua meigongnu tenpih ta hen,’ ci hi.

²⁹ Khatvei, unau pasal sagih om hi. A u pen in zi nei a, ta nei loin a si hi.

³⁰ Tua ciangin a naupa in tenpih a,

³¹ tua banah a nausawn in tenpih leuleu hi. Tua bangin a unau sagih dongin tenpih uh a, ta nei lo vive-in a si khin uh hi.

³² A tawpna-ah numei zong hong si hi.

³³ A unau sagih mahin hihnu tenpih ciat khin uh ahih manin thawhkik ni ciangin hih numei pen a kua pen’ zi hi ding ahi hiam?” ci-in a dong uh hi.

³⁴ Tua ciangin Jesuh in, “Tu huna hih leitung mite in numei le pasal kitenna nei uh hi.

³⁵ Ahi zongin sihna panin thokikin a hong tung ding hunah a nungta dingin a kilawm mite in kitenna cihte nei lo uh hi.

³⁶ Amaute pen vantungmi tawh kibang uh a, sithei nawn lo uh hi. Sihna panin a thokik khinte ahih manin amaute pen Pasian’ tate ahi uh hi.

³⁷ Tua tham loin Moses in zong misite a thawhkikna thu teltakin hong lak hi. Sawlpang kuang thu a genna munah Topa pen, ‘Abraham Pasian, Isaac Pasian, Jakob Pasian,’ ci-in a na gen hi.

³⁸ Amaute khempeuh hing uh ahih manin, Pasian pen mihingte’ Pasian hi a, misite’ Pasian hi lo hi, a cihnopna ahi hi,” ci-in a dawng hi.

³⁹ Tua ciangin Thukham hilh siate pawlkhat in, “Sia aw, na dawnna hoih mahmah hi,” a ci uh hi.

⁴⁰ Tua ahih manin Saddusi mite in thu a dong ngam nawn kei uh hi.

David’ Suan tawh kisai Thudotna

⁴¹ Ahi zongin Jesuh in amaute kiangah, “Bang hangin Thukham hilh siate in Khrih pen David’ suan hi, ci zenzen ahi uh hiam?

^42-43 Bang hang hiam cih leh David mahmah in La Bu sungah, ‘Topa in keima Topa tungah thu gen a: Na galte, na khenuai-ah ka koih matengin ka taklamah tu in,’ ci hi.

⁴⁴ David in Khrih pen, ‘Topa,’ ci ahih manin bang hangin Khrih pen David’ suan hi thei ding ahi hiam?” a ci hi.

Jesuh in Thukham hilh siate Mawhsak

⁴⁵ Tua ciangin Jesuh in mi khempeuh zakin a nungzuite kiangah,

⁴⁶ “Thukham hilh siate na batkhak loh nadingun kidawm un. Amaute in puantualpi silhnuam uh a, mihon lakah a kizahtak hopih ding deihin, kikhopna innsung le pawi lakah a om uh ciangin uliante’ tutna mun hoihte bekah tunuam uh hi.

⁴⁷ Meigong numeite tungah nuamtaksa-in, khemin a neihsateng uh laksak uh a, mite in mihoih a sak nading uh a deihna-un thu saupipi a ngen uh hi. Amau’ kineihkhemna tawh kizui-in a gimthuak ding uh lianzaw ding hi,” a ci hi.