Luka 12 - Tedim Bible

Kineihkhemna thu Hilhkholhna

¹ Mi a tul tampite hong kikhawmin khatlekhat a kisikkha gawp dongin kinehcipin a om laitakin Jesuh in a nungzuite kiangah thu gen masa a, “Farisi mite’ kineihkhemna ahi, a silngo uh limtakin kidawm un.

² A kiseelte khatvei teitei kimu ding a, thusimte khatvei teitei thulang suak ding hi.

³ Zan khuamial sunga na gente uh sun khuavak sungah kigenkik ding a, innsung tawngah na kihuau simnate uh mi khempeuh in theithang ding uh hi.

Kua Kihta Ding

⁴ “Lawmte aw, note kiangah kong genin-ah, pumpi a thahkhit ciangin a siazaw a hihthei nawn lote na kihta kei un.

⁵ Kuate kihta ding na hi uh hiam cih leh, mite in a thah khitsa mipa pen hell khuk sungah a khiathuah theilai Pasian na kihta un.

⁶ Gitta nga ciangin hamu-in kizuak lel hi lo ahi hiam? Tua bang hi lel napi-in Pasian in gitta khat beek mangngilh lo hi.

⁷ Na lutung uha om na sammal zah ciat nangawn uh Pasian in thei khin hi. Note lunghimawh kei un. Gitta tampi sangin na manphazaw ciat uh hi.

Khrih Mi Hi’ng, ci-in Mi’ Theihin Genna

⁸ “Note kiangah kong cihin-ah, keima mi ahihna mi’ theihin a genkhiate, Mihing Tapa in zong Pasian’ vantung mite’ mai-ah, keima mi hi, ci-in genkhia ding a,

⁹ ahi zongin keima mi ahihna mi’ theihin a genkhia nuam lote, Pasian’ vantung mite mai-ah zong keima mi hi, ci-in Mihing Tapa in genkhia nuam lo ding hi.

¹⁰ Mihing Tapa a langpangte a mawhna uh kimaisak thei ding a, Kha Siangtho a langpangte a mawhna uh kimaisak lo ding hi.

¹¹ Thusitna a thuak dingin kikhopna inn-ah ahi a, hausa zumah ahi zongin hong paipih uh ciangin bang gen ding a, bangci kihut ding ka hi hiam, ci-in lunghimawh kei un.

¹² Bang hang hiam cih leh a hun a tun ciangin Kha Siangtho in na gen dingteng uh hong hilh ding hi,” a ci hi.

A Hau Mihai pa Thugentehna

¹³ Tua laitakin mihon lak panin mi khat in Jesuh kiangah, “Sia aw, ka pa un a hong sihsan gamh pawlkhat tawh ka u in kei hong inntuan nadingin hong gensak in,” a ci hi.

¹⁴ Ahi zongin Jesuh in a mipa kiangah, “No unau’ gamh a hawm dingin kua in kei hong seh ahi hiam?” ci-in a dawng hi.

¹⁵ Tua ciangin Jesuh in amaute khempeuh kiangah, “Hoihtakin kidawm unla, na huaiham loh nadingun kikem un. Bang hang hiam cih leh bangzahta-in mi khat a hauh hangin a neihsa tawh a nuntakna taktak kicing zo lo hi,” a ci hi.

¹⁶ Tua ciangin Jesuh in amaute kiangah thugentehna khat gen a, “Mi hau pa khat’ lo-ah an tampi a piang hi.

¹⁷ Tua ciangin amah in a lungsim sungah, ‘Ka an khempeuh ka koih nading mun kicing lo ahih manin bangcih ding ka hi hiam?

¹⁸ Tua ahih manin hih bangin ka gamta ding hi: Ka ansalte phelin a lianzaw ansalte ka lam ding a, tuate sungah ka ante le ka neih khempeuh ka seng ding hi.

¹⁹ Tua ciangin keimah in: Mi hampha mahmah ka hi hi. Kum tampi sung ka khom ding annek tuidawn le na hoih tampi ka nei hi. An ne, zu ne-in, a nuam theithei-in ka om hithiat ding hi,’ ci hi.

²⁰ Ahi zongin Pasian in ama kiangah, ‘Mihai pa aw, tuzan mahmahin na si ding hi. Hih na neihsa teng kua’n zang nawn ding ahi hiam?’ ci hi,” a ci hi.

²¹ Tua ciangin Jesuh in a thugen a khupna-in, “Tua mah bangin amau a’ ding bekin a kholcipte pen Pasian’ muhna panin mihau hi lo uh hi,” a ci hi.

Lunghihmawh Kholhna

²² Tua ciangin Jesuh in a nungzuite kiangah, “Tua ahih ciangin note kiangah kong genin-ah: I nuntak nadingin bang ne ding a, i pumpi tungah bang silh ding ihi hiam, ci-in lunghimawh kei un.

²³ Nuntakna pen an sangin thupizaw a, pumpi pen puan sangin thupizaw hi.

²⁴ Vasate ngaihsun dih un: Amaute in khai tuh lo uh a, anlak cih zong nei lo uh hi. Amaute in beemlepang zong nei lo napi-in Pasian in annek tasamsak lo hi. Vasate sangin note nakpitakin na manphazaw uh hi.

²⁵ Note na lunghihmawh manun na nuntak hun uh nai khat sung bek a sotto thei kua om na hi uh hiam?

²⁶ Tua bang a themno khat nangawn hih thei lo na hih uhleh bang hangin adangte lunghimawh se na hi uh hiam?

²⁷ Gamlak a paakte ngaihsun dih un. Tuate in a nek ding uh na sem lo uh a, a silh ding uh puan zong gan lo uh hi. Ahi zongin note kiangah kong genin-ah: Bangzahin a hauh hangin Solomon nangawn, hih paakte khat zahin a hoihin kizem zo lo lai hi.

²⁸ Upna neu mite aw, tuni-in om a, zing ciangin keutumin meikhuk sungah a kikhultum lopa kungte, Pasian in puansilh guan ahihleh note hong guanzaw kan ding hi lo ahi hiam?

²⁹ Tua ahih manin bang ne ding, bang dawn ding, ci-in lunghimawhin om tawntung kei un.

³⁰ Gentail mi khempeuh in hih nate lunghihmawh penin nei uh hi. Hih nate na kisap lamtak uh zong na Pa un hong thei hi.

³¹ Tua ahih manin Pasian’ Ukna ngaihsutin nei masazaw un. Tua hileh hih na kisapna dangte uh zong Pasian in hong piathuah ding hi,” a ci hi.

Vantungah Sumkholna

³² Tua ciangin Jesuh in, “Tuuhon tawmnote aw, lau-in lunghimawh kei un. Na Pa un ama Ukna sungah ukna thu a nei dingin a hong sehsa ahi hi.

³³ Na neihsa uh zuak unla, mizawngte tungah tua sumte na pia un. Note a dingin a sia thei lo sumkholna na bawl unla, gutate in a luh zawh lohna, leikha in zong a nek zawh lohna, cikmahin a kiam ngei hetloh nading mun vantungah na sumte uh na khol un.

³⁴ Bang hang hiam cih leh na sum uh a omna munah na lungsim uh om tawntung ding hi,” a ci hi.

A Kiging Nasemte

³⁵ Tua ciangin Jesuh in, “Na kawng uh gakin, na mei uh vakin a kigingsa-in om unla,

³⁶ a topa uh mopawi simna panin hong tungin kongkhak a kiuh ciangin thakhatin kong a honpah theih nadingun a topa’ ciah ding a ngak nasemte bangin om un.

³⁷ A topa hong ciah ciangin a kigingsa-in amah ngakin a om uh a muh nasemte pen mi hampha mahmah ahi uh hi. Note kiangah kong genin-ah, a topa zong hong kithawi-in a nasemte an vak dingin tusak ding a, amahmah in a nasemte an thukin na a sem ding hi.

³⁸ Zankim laitak ahi a, zingsang khuavakkuan lam ahi zongin a hong ciah hun peuhpeuh ciangin amah ngakin a om a muh nasemte pen mi hampha mahmah ahi uh hi.

³⁹ Ahi zongin na phawk ding uh thu khat om hi. Mi khat in guta pa’ hong pai ding hun theikhol leh a inn luhsak lo ding hi.

⁴⁰ Tua mah bangin Mihing Tapa zong na upmawh loh uh hun laitakin hong pai ding ahih manin note zong a kigingsa-in om tawntung un,” a ci hi.

A Citak le A Citak lo Nasem

⁴¹ Peter in, “Topa aw, hih thugentehna ko bek nong cihna ahi hiam, ahih kei leh mi khempeuh a’ ding na cihna ahi hiam?” ci-in a dong hi.

⁴² Topa in, “A pil a citak nasempa i cih a bangcite ahi hiam? A naseppih dangte ukin a hun manmanin amaute’ nekzah ding ciat a pia dingin a topa in a seh nasempa ahi hi.

⁴³ A topa hong ciah ciangin hih ama sawl bangin a sem a muh nasempa pen mi hampha mahmah ahi hi.

⁴⁴ Ke’n kong cihin-ah, a neihsa khempeuh a uk dingin a topa in tua nasempa koih takpi ding hi.

⁴⁵ Ahi zongin tua nasempa in a lungsim sungah, ‘Ka topa hong ciahkik hak ding hi,’ ci-in ngaihsunin a naseppih numei le pasalte satgawp hen la, zukham ankhamin ommawk leh,

⁴⁶ tua nasem pa’ topa pen ama upmawh loh ni, a theihkholh loh hunin hong tung ding hi. A topa in nakpitakin amah gim pia ding a, a thumang lo mite tawh a kibangin a thuaksak khawm ding hi.

⁴⁷ A topa’ deihna thei napi-in a topa’ deih bangin a gamta nuam lo nasem pa pen nakpitakin kisat ding hi.

⁴⁸ Ahi zongin a topa’ deihna a theih lohna hangin satthuak nading a gamtakha nasem pa pen kidamsat zawdeuh ding hi. Tampi a kipiakna pa tung pan tampi kikal ding a, a tamzaw a ki-apna pa tung pan a tamzaw kikal ding hi,” ci-in a dawng hi.

Jesuh, Kikhenna A Piangsak pa

⁴⁹ Tua ciangin Jesuh in, “Leitungah meikuang a khah dingin a hong pai ka hi a, tu mahmahin a meikuang kipan khinta hileh ka ut hi.

⁵⁰ Gimna sungah ka kiphum nading khat om a, tua thu a kikhit matengin ka lungsim a nuam thei kei hi.

⁵¹ Leitungah kilemna a omsak dingin a hong pai hong sa na hi uh hiam? Hilo hi. Ke’n kong cihin-ah, kikhenna a omsak dingin a hong pai ka hizaw hi.

⁵² Tu a kipanin innkuan sungah mihing nga a phate, a langah thum, a langah nihin kikhenin kido ding uh hi.

⁵³ A pa in a tapa do-in, a tapa in a pa do ding a, a nu in a tanu do-in, a tanu in a nu do ding a, a teeknu in a monu do-in, a monu in a teeknu do ding hi,” a ci hi.

Hun Theihna

⁵⁴ Jesuh in mihonte kiangah zong, “Nitumna lamah meiipi hong kai na muh uh ciangin, ‘Guah hong zu ding hi,’ ci-in thakhatin na genthei pah uh a, tua mah bangin guah hong zu takpi hi.

⁵⁵ Leitaw lam panin huih hong nun’ ciangin, ‘Ni hong sa ding hi,’ na ci uh a, tua mah bangin ni hong sa takpi hi.

⁵⁶ No a kineihkhem mite aw, vanlelei na et uh ciangin a piang ding thu thei na hih uhleh, tuhun thute bang hangin theithei lo na hi uh hiam?” a ci hi.

Na Langte uh tawh Kilem Un

⁵⁷ Tua ciangin Jesuh in, “Bang hangin na gamtat nading uh a manin khen thei lo na hi uh hiam?

⁵⁸ Mi khatpeuh in na tungah thu hong bawlin zum-ah hong paipih leh, zuma thukhente mai-ah hong kaigawpin, thukhente in palikte kiangah hong apin, palikte in thong sungah a hong koih loh nadingin, na lang pa uh tawh na thu uh a siantheih nadingin na siam tawpun lamkalah hanciam un.

⁵⁹ Ke’n kong cihin-ah, tua bangin gamta kei le-uhcin, na liausum uh na piak khit matengun thong panin na suakta kei ding uh hi,” a ci hi.