Late 99 - Tedim Bible

Siangtho Pasian Phatna

¹ Topa in uk hi. Mihonte ling hen. Kherub-te tungah amah tu hi. Leitung ling tahen.

² Zion khuapi-ah Topa lian a, amah in leitung mi khempeuh uk hi.

³ A lian a kihtakhuai ama min mi khempeuh in phat ta uh hen. Amah siangtho hi.

⁴ Thutang a deih, Vanglian Kumpipa aw, nangmah in thuman na phut khin a, Israel-te sungah thutang le thuman na semkhia hi.

⁵ I Topa Pasian phat unla, ama khengakna munah bia un. Amah siangtho hi.

⁶ Moses le Aaron-te ama siampi hi uh a, amah a biate lakah Samuel zong a kihel hi. Topa’ tungah amaute kiko uh a, amah in amaute a dawng hi.

⁷ Amah in meii khuampi sung pan amaute tungah thu gen a, ama teci pannate le amah in amaute tungah a thukham piakte amaute in a zui uh hi.

⁸ Kote’ Topa Pasian aw, nang in amaute na dawng hi. Amau’ mawhna hangin gim na piak tei hangin amau’ mawhnate a maisak nuam Pasian na hihna amaute’ tungah na kilangsak hi.

⁹ I Topa Pasian phat unla, ama mual siangtho-ah bia un; bang hang hiam cih leh i Topa Pasian a siangtho hi.