Late 95 - Tedim Bible

Pasian Phatna: Thumang lote Hilhkholhna

¹ Hong pai un, Topa phat ni. Eite a hong hu, a hong honkhia pa tungah lungdamna la sa ni.

² Ama omna-ah lungdamna ko-in pai ni. Phatna late, ama tungah lungdam takin sa ni.

³ Bang hang hiam cih leh Topa, a lian Pasian hi a, pasian khempeuh tungah Kumpi lianpa ahi hi.

⁴ Amah in leitung khempeuh uk a, guam thuk pen panin mual sang pen dawn dongin amah in a uk hi.

⁵ Ama bawlsa tuipite uk a, ama bawlsa leitung zong amah in a uk hi.

⁶ Hong pai un, amah bia-in kun ni. Eite hong Bawl Topa’ mai-ah khukdin ni.

⁷ Bang hang hiam cih leh amah pen eite’ Pasian hi a, eite pen ama hong kep mite le ama khutsunga om a tuute ihi hi. Tuni-in hih bangin ama hong thugen za un:

^8-9 Amaute in ka nasepna mu khin uh hinapi, Meribah le Massah munah na pate un kei hong ze-etin, gamtatna tawh ka lah ding hong kalh hun lai uh bangin, note in na lungsim uh khauhsak kei un.

¹⁰ Kum sawmli sung tua minam ka kih a, “Amaute pen a lungsim uhah a khial mi hi a, amaute in ka thupiakte mang lo uh hi,” ka ci hi.

¹¹ Tua ahih ciangin keima nopsakna munah amaute a lut lo dingin sinso kawmin ka kiciam hi.