Late 93 - Tedim Bible

Pasian’ Liatna

¹ Topa in uk a, vangliatna kumpi puan kisilhsak hi. Topa, kumpi puan kisilhsak a, thahatna tawh amah kidim hi. Leitung kikipsak a, kiling ngei lo ding hi.

² Tanglai pek panin na tokhom a kipsa hi a, nang pen a tawntung a om na hi hi.

³ Topa aw, gunte hong khangin, a aw uh hong sangsak a, nakpitakin hong ging hi.

⁴ A sangna munah a om Topa vanglian hi. Tui tampi gingte sangin vanglian zaw a, tuipi hualte sangin vanglian zaw hi.

⁵ Na thupiaknate kip mahmah hi. Topa aw, sianthona pen a tawntungin na inn tawh a kilawm ahi hi.