Late 92 - Tedim Bible

Pasian’ Huhna Phatna

^1-3 Sangpenpa aw, Topa tungah lungdamna lah ding, nangma min phatna la sak dingin kilawm a, zangsawm khausai lasakna le harp lasakna, laiza lasaknate tumin, zingsangin nangma itna kip, zanin na thumanna genkhiat dingin a kilawm ahi hi.

⁴ Bang hang hiam cih leh Topa aw, nangma sepna tawh kei nong lungdamsak a, nangma sepnate hangin lungdamin la ka sa hi.

⁵ Topa aw, na nasepnate lian mahmah a, na ngaihsutnate thuk mahmah hi.

^6-8 Migilote, lopa bangin selkhia-in, siatna bawl khempeuh a pun’ mahmah hangun, a tawntungin siatna a thuak ding uh ahi hi. Ahih hangin Topa aw, nang pen a sangna-ah a omden na hihna thu, lungsimmawl mi in theithei lo a, lungsim tei lo mi in tel thei lo hi.

⁹ Topa aw, na galte si ta ding! Bang hang hiam cih leh na galte beimang ding a, siatna a bawl khempeuhte kithehthang ding uh hi.

¹⁰ Ahih hangin nangmah in zangsial bangin kei na hong hatsak a, kei thupha hong pia-in nong lungdamsak hi.

¹¹ Ka galte’ pukna ka mit in mu khinta a, keimah a hong do a gilote’ siatna ka bil in za khinta hi.

¹² Nisuh kung bangin thuman mi palh a, Lebanon mualtung a om taamtak kung bangin a khang hi.

¹³ Topa’ inn sungah amaute kisuan a, i Pasian’ huang sungah amaute palh uh hi.

^14-15 Topa thutang hi, ci-in a lah nadingun amaute teek napi-in gah lailai uh a, amaute tui kiuhkeuhin hing sitset uh hi. Amah pen kei hong hupa hi a, ama sungah thuman lohna om lo hi.