Late 91 - Tedim Bible

Pasian in Amah a Muangte Hu

¹ Sangpenpa’ liahna sung, Vanglianpa’ liim sungah a om mi khempeuh in

² Topa’ tungah, “Ka bukna le ka munkip muanhuai, ka muan ka Pasian na hi hi,” ci ding uh hi.

³ Bang hang hiam cih leh amah in thangsiah pa’ thangzak le a lauhuai pulnatna panin nang hong honkhia ding hi.

⁴ Amah in a khate tawh nang hong tuam ding a, ama khate’ nuai-ah bukna ding na mu ding hi. Ama thumanna in nang hong dalin hong hu ding hi.

^5-6 Nangmah in zan a lauhuaina, sun-a thaltang leengte, khuamial lakah a vak khiankhian pulnatna, sun nitaang a suksiatnate na kihta kei ding hi.

⁷ Na kiangah mi tulkhat, na kimkotah mi tul sawm, hong tukin a sih hangin bangmah na ci kei ding hi.

⁸ Na mit tawh na en bek ding a, migilote a kithukkikna na mu ding hi.

⁹ Nangmah in Topa pen na buk nadingin bawlin, Sangpenpa, nang a hong hu dingin bawl khin na hih manin

¹⁰ nangma tungah siatna hong tung lo ding a, na inn sungah gimna hong tung lo ding hi.

¹¹ Bang hang hiam cih leh nangmah a hong cing dingin amah in ama vantungmi nang hong kemsak ding hi.

¹² Na khete le suang a kitahkhak loh nadingin amaute in a khut uh tawh nang hong dom ding uh hi.

¹³ Nangmah in humpinelkai le gul gunei tung na tawn ding a, na khenuai-ah humpinelkai khanglai le gulpi na tuancil ding hi.

¹⁴ Itna tawh hong bel ahih manin amah ka honkhia ding a, ka min hong thei ahih manin mun sangna-ah amah ka koih ding hi.

¹⁵ Amah in hong sap ciangin amah ka dawng ding hi. Haksatna sungah amah ka ompih ding a, amah honkhia-in ka pahtawi ding hi.

¹⁶ Nuntak sau tawh amah ka lungkimsak ding a, amah ka honkhia ding hi.