Late 9 - Tedim Bible

A Manin Pasian’ Thukhenna Hangin Lungdamna

¹ Ka lungsim khempeuh tawh Topa tungah lungdamna kong ko ding a, na bawl a lamdangte khempeuh ka gen ding hi.

² Nangma hangin nuamin ka diang ding a, na min phatna ka sa ding hi, Sangpenpa aw.

³ Ka galte a nungkik ciangin, nangma mai-ah amaute pukin kisia uh hi.

⁴ Bang hang hiam cih leh keima thutanna na hong kipsak a, tokhom tungah tu-in thu a manin na khen hi.

⁵ Minamte na taii a, migilote na susia hi. A maimang dingin amau’ min na phiat hi.

⁶ Siat denna sungah galte beimang hi. A khuate uh na zunglot a, amaute kiphawkkha nawn lo hi.

⁷ Topa ahihleh kumpi za-ah tu ngitnget a, thukhen nadingin a tokhom a bawl hi.

⁸ Leitung mite’ thu a mantakin khen a, a kilawm bangin mite’ thu a khen hi.

⁹ Topa pen, netniamna a thuakte a’ dingin munkip hi a, haksat hun ciangin munmuanhuai ahi hi.

¹⁰ Topa aw, nang a hong zongte nusia lo na hih manin, na min a theite in nang hong muang uh hi.

¹¹ Zion-ah a om Topa phatna la sa un! Ama nasepnate mite’ lakah gen un!

¹² Bang hang hiam cih leh mi thahna a hua pa in amaute phawk a, a thuak mite’ awging amah in mangngilh lo hi.

¹³ Ka tungah hong dik in, Topa! Sihna pan hong honkhia pa aw, kei hong mudahte’ hangin keima gim thuaknate hong en inla,

¹⁴ nangmah a hong kiphatnate phawk kikkik inla, na hong hotkhiatna hangin Jerusalem khua sungah ka nuamna ka gengen ding hi.

¹⁵ Amau’ bawlsa gum sung mahah minamte kiasuk uh a, a ngenthang siahna uhah amau’ khe mah a awk hi.

¹⁶ Topa in thu hong khenin migilote amau’ nasepna mahah awksakna tawh amah hong kilang hi.

¹⁷ Pasian a mangngilh minam khempeuh sung panin migilote, Leinuai-ah pai ding uh hi.

¹⁸ Bang hang hiam cih leh mi cimawhte kimangngilh den lo ding a, mizawngte’ lametna bei paisuak lo ding hi.

¹⁹ Tho in, Topa! Mi kizosak ke’n; na mai-ah minamte sam inla, amaute’ tungah thu khen in!

²⁰ Amaute lausak in, Topa! Mi ahih lelna uh minamte theisak in!