Late 89 - Tedim Bible

David tawh Pasian’ Thuciamna

¹ Topa aw, na itna kip la-in ka sa tawntung ding a, nangma thutakna ka gen tawntung ding hi.

² Bang hang hiam cih leh nangma itna kip tawntung a, na thutakna zong vantung bangin kip tawntung hi.

³ Nangmah in, “Ka teelpa tawh thuciamna ka bawlzo a, ka nasem David tungah thu ka ciamzo hi:

⁴ ‘Na suan na khakte kumpi-in ka kipsak ding a, na kumpi gam khang tawntungin ka kipsak ding hi,’” na ci khin hi.

⁵ Topa aw, na nasepna a lamdangte, vantungte phatsak inla, mi siangthote’ kikhopna sungah na thumanna phatsak in.

^6-7 Bang hang hiam cih leh Topa pen vantung a kua tawh kitehthei ding ahi hiam? Mi siangthote’ kikhopna sungah a kizahtak Pasian, a kiima omte khempeuh tungah lianin a zahtakhuai Topa pen van mite’ lakah kua pen tawh kibang ahi hiam?

⁸ Vanglian Topa Pasian aw, na khempeuhah na thutak a, nangmah bangin a vanglian kua om ahi hiam, Topa aw.

⁹ Nang in tuipi khang na uk a, a tuihualte a san ciangin na daisak hi.

¹⁰ Nangmah in a kithat lumsa luanghawm khat bangin ganhing golpi Rahab na sugawp a, na thahatna tawh na galte na zogawp hi.

¹¹ Vantungte nangma a’ hi a, leitung zong nangma a’ mah ahi hi. Leitung le a sunga om khempeuh nangma phuhsa ahi hi.

¹² Saklam le khanglamte nangma bawlsa hi a, Tabor mual le Hermon mual in lungdamna tawh na min hong phat uh hi.

¹³ Nangma vang lian mahmah a, na thahatna kigen thei lo hi.

¹⁴ Thuman le thutang tawh na ukna za na phut a, itna kip le thuman tawh na khempeuh na sem hi.

^15-16 Topa aw, lungdamin lasakna tawh nang hong bia a, na migitna khuavak sungah nuamtakin a nungta, nangma hangin sunthapai-in lungdam a, nangma hoihna hong phat mite mi nuamsa ahi uh hi.

¹⁷ Bang hang hiam cih leh nangmah in nakpitakin kote na hong gualzosak a, kote hong angvanin na hong gualzosak hi.

¹⁸ Kote a hong hu Topa hi a, Israel-te’ Siangtho Pasian nangmah in ka kumpipa uh nong pia hi.

¹⁹ Hun lui lai-in na thuman mipa tungah mang sungah thu na gen a, “A vanglian khat pa tungah lukhu ka koih khinzo a, mite lak panin a kitengkhia mi khat ka liansakzo hi.

^20-21 Ka nasempa David ka muzo hi. Ka thahatna ama tungah a om ngitnget theih nading, ka vangliatna in zong, amah a thakhauhsak theih nadingin ka sathau siangtho amah ka nilh khin hi.

²² Galte in amah khemzo ngei lo ding a, migilote in zong amah zo ngei lo ding uh hi.

²³ Ama mai-ah a galte ka sugawp ding a, amah a mudahte ka satpuk ding hi.

²⁴ Amah it tawntungin ama tungah ka thutak ding a, amah a gualzo-in ka bawl tawntung ding hi.

²⁵ Mediterranean Tuipi a kipan Eufratis Gunpi dong amah ka uksak ding hi.

²⁶ Amah in kei kiangah, ‘Nang pen keima Pa le ka Pasian na hi a, kei a hong honkhia pa le a hong hupa na hi hi,’ hong ci ding hi.

²⁷ Keimah in amah ta upa penin ka bawl ding a, leitung kumpite lakah a lianpenin ka bawl ding hi.

²⁸ Amah ka itna ka kipsak tawntung ding a, ama tungah ka thuciamna ka kipsak tawntung ding hi.

²⁹ Ama suanlekhakte kumpi ka hisak ngitnget ding a, a ukna za, vantung bangin ka kipsak ding hi.

^30-32 “Ama tate in ka thukhamte nusia-in, ka biakna ngeina kip om bangin a gamtat kei uh a, amaute in ka ngeina siasakin ka thupiak a zuih kei uhleh, amaute’ thupalsatna hangin ciang tawh gim ka pia ding a, amau’ mawhnate hangin satna tawh gim ka pia ding hi.

³³ Ahih hangin amah ka itna ka khiam kei ding a, ka thuciamna ka kipelhsak kei ding hi.

³⁴ Ka thuciamna siasak loin, ka kam pana paikhia thute ka kheel kei ding hi.

³⁵ “A tawntung a kimang dingin ka sianthona tawh khatvei ka kiciam khin a, David’ tungah ka zuau kei ding hi.

³⁶ Ama suanlekhakte kizom paisuak ding a, vana ni a taan laiteng a kumpi gam ka kipsak ding hi.

³⁷ Khapi bangin tua pen kipsuak ding a, vantung a om laiteng kip ding hi,” na ci hi.

³⁸ Ahih hangin tu-in amah nialin na lawnkhia a, na sathau nilh pa’ tungah na heh mahmah hi.

³⁹ Na nasempa tawh na thuciamna na pelh khin a, ama kumpi lukhu leivui lakah na paihsak hi.

⁴⁰ Ama kulhte khempeuh na sukham khin a, ama galpanmun kipte a sia na suah khin hi.

⁴¹ A pai khempeuh in ama nate sutgawp uh a, amah pen a vengte’ nuihsat a suak hi.

⁴² Ama galte na gualzosak a, ama galte na lungdamsak khin hi.

⁴³ Ama galhiamte a mawkna na suaksak a, gal kidona-ah amah na guallelsak hi.

⁴⁴ Nangmah in ama khut panin a kumpi ciangkhut na lakhia a, a kumpi tokhom leilak na denna hi.

⁴⁵ Nangmah in a teek hun nai lopi-in amah na teeksak a, maizumna tawh na kidimsak hi.

⁴⁶ Topa aw, nang bang tanvei bucip den ding na hi hiam? Na hehna bang tanvei meikuang bangin kuangkuang ding ahi hiam?

⁴⁷ Topa aw, nuntak hun a tom mahmahlam hong phawk in. Mihingte a mawk nadingin bawl na hi hiam?

⁴⁸ A si thei lo kua om ahi hiam? Sihna hankhuk panin kua suaktazo ahi hiam?

⁴⁹ Topa aw, na thumanna tawh David tunga na thuciamna, hun lui lai-a na itna kip koi-ah omta ahi hiam?

^50-51 Topa aw, na nasempa bangzah takin hong kithusim lohna, galte in phinna-in a hong neihna, Topa aw, amaute in na sathau nilh pa a paina khempeuhah a hong nuihsatna uh hong phawk ta in.

⁵² Topa in thupha ngah tawntung tahen. Amen! Amen!