Late 87 - Tedim Bible

Pasian’ Khuapi Minthang

¹ Mual Siangtho tungah ama phuhsa khuapi om hi.

² Topa in Israel gam mundang khempeuhte sangin Zion kulhkongpi itzaw hi.

³ Pasian’ khuapi aw, na minthanna teng hong kigengen hi.

⁴ Kei hong theite lakah Egypt le Babylon ka hel hi. Filistia, Taia le Ethiopia te zong kihel a, “Hihte pen hua lai mah panin a piang ahi hi,” kici ding hi.

⁵ Zion tawh kisai-in ahihleh, “Minam khempeuh ama sung pana suak ahi hi,” kici ding hi. Bang hang hiam cih leh Sangpenpa mahmah in amah kipsak ding hi.

⁶ Topa in, “Hihte pen hua lai-a suak,” ci-in minam khempeuh ciamtehin a gelh ding hi.

⁷ Tua sunga teng mite in, “Kote’ lungdamna khempeuh nangma sungah om hi,” ci ciat ding uh hi.