Late 85 - Tedim Bible

Pasian in Israel-te A Hehpih ding Ngetna

¹ Topa aw, nangma leitang na hehpih a, Jakob’ nopsaknate a ngeina na bangsakkik hi.

² Na mite’ mawhna na maisak a, amau’ khialhna khempeuh na maisak hi.

³ Na hehna khempeuh na damsak a, na sinsona na daisak hi.

⁴ Kote hong honkhia Pasian aw, kote ka ngei uh hong bangsakkik inla, kote tunga na lungkim lohna hong beisak ta in.

⁵ Kote’ tungah heh paisuak ding na hi hiam? Khang tawntungin heh paisuak ding na hi hiam?

⁶ Kote in nangmah kong phat theih nadingun ko na mite hong nungtasakkik lo ding na hi hiam?

⁷ Topa aw, kote tungah na itna kip hong lak inla, hong huhin hong hon in.

⁸ Topa Pasian’ thugen ding hong zasak dih un. Bang hang hiam cih leh ama lamah lungsim takpi tawh a kihei ama mi siangtho, ama mite’ tungah kilemna thu a gen ding hi.

⁹ I gam sungah minthanna a om theih nadingin amah a zahtakte a dingin ama hong hotkhiatna hong om takpi hi.

¹⁰ Itna kip le thutak kigawm ding a, thuman le kilemna kihual ding uh hi.

¹¹ Leilak panin thutak hong pokhia ding a, vantung panin thuman in hong ensuk ding hi.

¹² Topa in a hoih nate eite tungah hong pia ding a, i leitang in hauhna piangsak ding hi.

¹³ Topa’ mai-ah thuman na ma pai ding a, ama lampi a bawlkhol ding hi.