Late 77 - Tedim Bible

Lungkham Ciangin Kihehnepna

¹ Pasian’ tungah a gingin ka kiko khia a, a hong zaktheih nadingin a gingin ka kiko hi.

² Ka lungkham hunin keimah in Topa ka zong hi. Zanin thu ngenin gim hetloin ka khut ka zan a, ahi zongin hehnepna ka ngah kei hi.

³ Keimah in Pasian ka ngaihsun a, ka tautau hi. Lung ka geelgeel a, ka gim mahmah hi.

⁴ A ihmu lo dingin kei na hong bawl a, lungkham lua-in ka pau thei kei hi.

⁵ Hun luite ka ngaihsun a, sawtpek lai-a kumte ka phawk hi.

⁶ Zanthapai-in ka lungsimah ka kihoho a, lung geelgeelin thu ka kan ciangin:

⁷ “Topa in hong nial paisuakin, kei tungah maipha hong piakik lo ding hiam?

⁸ Ama itna kip bei paisuakin, ama thuciamte maimang suak ding hiam?

⁹ Pasian in hehpihna a neih ding mangngilh khinta ahi hiam? Ama hehna in hehpihnate vukcip khin ahi hiam?” ka ci hi.

¹⁰ Tua bang ahihleh, “Sangpenpa’ hat nawn lohna pen ka khakham veina ahi hi,” ka ci hi.

¹¹ Topa’ sepnate ka lungsimah ka phawk ding a, hun lui lai-a nangma na lamdangte ka ciamteh ding hi.

¹² Nangma nasepna khempeuh ka lungngaingai ding a, nangma sep na liante ka ngaihsunsun ding hi.

¹³ Pasian aw, nangma lampi siangtho hi. Eima Pasian tawh kibangin bang pasian lian ahi hiam?

¹⁴ Nang pen na lamdangte a bawl, minam dangte’ lakah na vangliatna a langkhiasak khin Pasian na hi hi.

¹⁵ Nangmah in na vangliatna tawh Jakob le Josef’ suante, na mite na honkhia hi.

¹⁶ Tui in nang hong muh ciangin Pasian aw, tuite in nang hong muh ciangin a lau uh hi. Tui thukpi zong a ling hi.

¹⁷ Meiipite in tui sungkhia-in, vante ging damdam a, nangma thaltangte mun citengah a leeng uh hi.

¹⁸ Na vanging lianpi pingpei sungah omin, khuaphialepte in leitung taan a, leitang linggawpin a kising damdam hi.

¹⁹ Nangma lamlianpi tuipi tung hi a, nangma lamneute zong luiliante’ tung mah ahi hi. Ahi zongin na khekhapte kimu lo hi.

²⁰ Nangmah in Moses le Aaron’ khut tawh nangma mite tuuhon bangin na makaih hi.