Late 75 - Tedim Bible

Pasian in Thu a Manin A Khenna

¹ Pasian aw, nangma tungah ka lungdam mahmah uh a, nangma tungah ka nuam mahmah uh hi. Nangma liatna thu ka gen uh a, a lamdang na bawlnate ka sut kikkik uh hi.

² A hun ka sehsa ni ciangin thu a manin ka khen ding hi.

³ Leitung le a tunga tengte khempeuh a kilin’ ciangin a khuampite a kipsak pa keimah ka hi hi.

⁴ A kiphasakte tungah, “Kiphasak kei un,” a gilote tungah, “Kihisak kei un.

⁵ Kihisak kei unla, kiphatsakna tawh kampau kei un,” ka ci hi.

⁶ Bang hang hiam cih leh vangliatna pen nisuahna lam ahi a, nitumna lam ahi a, gamlak pan ahi zongin a hong pai hi lo hi.

⁷ Mihing khat a sangsak, mihing khat a niamsak thukhen pa pen Pasian ahi hi.

⁸ Bang hang hiam cih leh Topa’ khut sungah leenggahzu a phuan, a kihelkim ngingei hai khat om a, amah in tua sung panin hong bungkhia ding a, leitung migilo khempeuh in a tawdat dong takin a liaktum ding uh hi.

⁹ Ahih hangin kei ahihleh ka lungdam ngitnget ding a, Jakob Pasian’ tungah phatna late ka sa ding hi.

¹⁰ Migilote’ vangliatna khempeuh amah in susia ding a, ahih hangin thuman mite’ vangliatna khang semsem ding hi.