Late 73 - Tedim Bible

BU THUMNA ( La 73-89 ) Migilote’ Daupaina: Amaute’ Mong le Midikte’ Mong Etkakna

¹ Israel mite bangin a lungsim a siangtho a thutang mite tungah Pasian hoih takpi hi.

² Ahih hangin kei ka hih leh ka khe kisuipuk dektak a, ka khe taal dektak hi.

³ Bang hang hiam cih leh migilote’ daupaina ka muh ciangin mi kihisakte ka eng hi.

⁴ Bang hang hiam cih leh amaute in nat velvalna bangmah thuak lo uh a, a pumpi uh cidamin zol hilhial hi.

⁵ Amaute in midangte bangin haksatna thuak lo uh a, amaute in midangte bangin gimna ngah lo uh hi.

⁶ Tua ahih ciangin amaute in khainiang bangin kiphatsakna ok uh a, puan bangin ngongtatna silh uh hi.

⁷ A lungsim panun gitlohna pusuaksak uh a, a ngaihsutna uh gitlohna tawh a dimlet hi.

⁸ Amaute in mi thusim loin el pau uh a, kiliatsakna tawh a sucip dingin mi a tawng uh hi.

⁹ Amaute’ gensiatna in vantung dong banto a, kiliatsakna tawh leitungah thu gen kawikawi uh hi.

¹⁰ Tua ahih ciangin mite in amaute phat uh a, amau’ mawhna zong lo uh hi.

¹¹ Amaute in, “Pasian in bangci theih ding ahi hiam? Sangpenpa in phawk ding ahi hiam?” ci uh hi.

¹² Amaute migilo ahi uh hi. A tawntungin nuamtakin om hithiat uh a, amaute a hauhna uh khang semsem zaw lai hi.

¹³ Ka lungsim siangsak a, mawhna ka bawl loh hangin a phattuamna om tuan lo hi.

¹⁴ Bang hang hiam cih leh sunthapai-in gimna ka thuak a, zingsang simin hong kithuhilh hi.

¹⁵ Tu-a bangin thu a gen hi leng, nangma mite tungah a thutak lo ka suak ding hi.

¹⁶ Ahih hangin hih thu a bangci hiam, ci-in ka ngaihsut ciangin kei a dingin a lunggimhuai mahmah nasep khat hong suak a,

¹⁷ Pasian’ biakinn sungah ka pai ciangin a thutawpna dongte ka tel hi.

¹⁸ Nangmah in amaute mun nalna-ah na koih takpi ding a, a sia dingin amaute na tuksak ding hi.

¹⁹ Tomno sungin amaute kisusia-in, lau mahmahna in amaute nilkhiamang ding hi.

²⁰ Amaute pen zan a mangmat tawh kibang lel a, na khanlawh ciangin amaute a bangci pian hiam, ci-in na phawk nawn kei hi.

²¹ Ka lung khamin ka lungsim hong nat ciangin,

²² keimah hai-in bangmah ka thei kei a, nangma mai-ah ganhing tawh ka kibang hi.

²³ Ahih hangin nangmah tawh ka omkhawm ngitnget a, ka khut taklamin kei na hong len hi.

²⁴ Thulahna tawh keimah nong makaih a, a nung ciangin minthanna munah na hong tunpih ding hi.

²⁵ Nang simloh vantungah kua nei ka hi hiam? Nang simloh ka deih ding leitungah kuamah om lo hi.

²⁶ Ka lungsim le ka pumpi zawngkhal kha ding a, ahih hangin Pasian pen ka lungsim hatna le keima a’ hi tawntung ding hi.

²⁷ Bang hang hiam cih leh nang tawh a kigamlate kisia ding uh a, nangma tungah a hong khialte na beisak ding hi.

²⁸ Ahih hangin kei a dingin Pasian’ kiangah om ding a hoih ahi hi. Na sepnate khempeuh ka gentheih nadingin Topa Pasian ka hong bel hi.