Late 71 - Tedim Bible

Puteek khat’ Thungetna

¹ Topa aw, nang kong bel hi. Kei hong zahhuaisak kei in.

² Na thumanna tawh kei hong huh inla, hong honkhia in. Keima lamah na bil hong ngat inla, hong hon in.

³ Hong hon dingin ka belh suangpi, ka kulh muanhuai, hong hi ta in; bang hang hiam cih leh keimah hong honpa le ka belh pa na hi hi.

⁴ Ka Pasian aw, migilote’ khutsung pan le thuman lo mite le migilote’ matna panin keimah hong hon in.

⁵ Bang hang hiam cih leh Topa Pasian aw, ka neu lai a kipanin ka hong lamet, ka hong muan na hi hi, Topa aw.

⁶ Ka suah tung a kipanin nangmah kong bel a, ka nu’ gil sung panin hong lakhia pa na hi hi. Nangmah ka hong phat ngitnget hi.

⁷ Mi tampite a dingin a siahil bang ka hih hangin nang pen a muanhuai, keima belh na hi hi.

⁸ Sunthapai-in nangmah ka hong phat a, na minthanna ka gen tawntung hi.

⁹ Ka teek hun ciangin kei hong lawnkhia kei inla, ka tha a kiat ciangin kei hong nusia kei in.

¹⁰ Bang hang hiam cih leh ka galte kihoho-in, keimah hong thahnopna thu kikumkum uh hi.

¹¹ “Pasian in amah nusiazo a, amah a hon ding kuamah om lo ahih manin, amah delhin man ni,” kici uh hi.

¹² Pasian aw, kei kiang panin gamla om kei in. Ka Pasian aw, keimah a huh dingin hong manlang in.

¹³ Kei hong mawhsakte zahhuai-in beimang uh hen la, keima siatna ding a zongte simmawhna le minsiatna in tuamcip tahen.

¹⁴ Ahih hangin ke’n, nang kong lamen ding a, nangmah kong phat semsem lai ding hi.

¹⁵ Thuman tawh na hotkhiatna na nasepnate simzawh lohin tam ahih manin sunthapai-in ka gengen ding hi.

¹⁶ Topa Pasian aw, na nasep liante ka phat ding a, na thumanna bek genin ka nei ding hi.

¹⁷ Pasian aw, ka khangno lai a kipanin nong thuhilh a, a lamdang na nasepnate ka gengen lai hi.

¹⁸ Tua ahih ciangin Pasian aw, hong piang lai ding mite khempeuh tungah nangma hatna thu ka gen khit matengin, teekin ka sam a kang zongin kei hong nusia kei in.

¹⁹ Pasian aw, na vangliatna le na thumanna in van sangpite banto hi. Pasian aw, na lianpipi na sem khinzo hi. Nang tawh a kibang kua om ahi hiam?

²⁰ Gimna lianpipi a hong tuaksak nangmah in kei nong hingkiksak ding a, lei thukpi sung panin nong lakhiato ding hi.

²¹ Nangmah in ka min hoihna nong khangsak ding a, nong hehnem kik ding hi.

²² Ka Pasian aw, na thumannate hangin kei zong harp lasakna tawh nangmah kong phat ding hi. Israel-te’ Siangtho Pa aw, laiza lasakna tawh nangmah phatna ka sa ding hi.

²³ Nangmah phatna ka sak ciangin nuamin ka awng ding a, na hong hotkhiatna hangin ka lungsim khempeuh tawh nuamin ka awng ding hi.

²⁴ Keima siatna ding a zongte kizahhuaisak khin a, minsia khinzo ahih manun thuman tawh na hong huhna sunthapai-in ka gengen ding hi.