Late 70 - Tedim Bible

Pasian’ Huh Baih ding Ngetna

¹ Pasian aw, keimah hong honkhia nuam in. Topa aw, keimah a huh dingin hong manlang in.

² Kei, thah hong sawmte maizumin kibuaigawp sak in. Keima siatna ding a deihte nungkiksak inla, mindaisak in.

³ “Ha, ha!” a cite a maizumna uh tawh maikhingsak in.

⁴ Nang hong zongte khempeuh lungdam mahmahin na min hangin kipak tahen. Na hotkhiat ding a utte in, “Pasian lian hi,” cici tahen.

⁵ Ahih hangin kei zawngin ka cimawh hi. Pasian aw, hong manlang in. Nang pen keimah huhpa le hong honkhia pa na hi hi. Topa aw, hong zekai kei in.