Late 69 - Tedim Bible

Hotkhiat ding le Thukkik ding Ngetna

¹ Pasian aw, hong hon in! Bang hang hiam cih leh tuikhang in ka ngawng ciang hong tuum ta hi.

² Khe tawh dinkipna ding mun a om lohna buannawng thuk sungah ka tumsuk a, tuithuk sung tung khinta-in ka tungah tuikhang a luang hi.

³ Ka kikokona-in ka gim a, ka dang keuta hi. Ka Pasian ka ngakngakna-in ka mitte maang ta hi.

⁴ Thu om lopi-in kei a hong mudah mi, ka lu tunga samzangte sangin tamzaw uh hi. Kei a hong susia ding, zuauthu tawh a hong dote hat mahmah uh hi. Kei’ guk lohpi ke’n loh ding ka hi hiam?

⁵ Pasian aw, ka pil lohna na thei a, ka tatkhialhnate nangma kiang pan kiliah lo hi.

⁶ Vanglian Topa Pasian aw, nangmah a hong muangte keima hangin zahhuaisak kei in. Israel Pasian aw, nang a hong zongte keima hangin mindaisak kei in.

⁷ Bang hang hiam cih leh nangma hangin kona ka thuak a, maizumna in kei hong pumtuam khinta hi.

⁸ Ka sanggamte lakah midangpi ka suak a, khualmi ka bang hi.

⁹ Nangma inn ka deihluatna mei bangin ka sungah sa a, nangmah hong kote’ konate keima tung hong tu hi.

¹⁰ An ngolhna tawh ka lungsim ka kiniamkhiat a, tua pen keimah hong kikona lehsuak zawsop hi.

¹¹ Ka puan dingin puanhampi bawl taleng zong amaute a dingin gentehna ka suak veve hi.

¹² Kongzing lakah mite’ gengen ka hi a, zukhamte in keima thu la-in hong sa uh hi.

¹³ Topa aw, ke’n ahihleh nang tungah thu kong ngen hi. A kicing na itna kip tawh a hun hoih ciangin hong dawng in, ka Pasian aw.

¹⁴ Buannawng thuk sungah tumsukna ding panin nangma thuman huhna tawh kei hong hon inla, tuithukte le ka galte’ kiang panin kei hong suaktasak in.

¹⁵ Keima tungah tuikhang lauhuai hong luangsak kei inla, khuamial thukpi hong nawmvalhsak kei in. Gum in a kuavang keima tungah hong khaknelhsak kei in.

¹⁶ Topa aw, na itna kip hoih ahih manin kei hong dawng inla, na hehpihna lian a om tawh kizui-in kei’ lam hong nga in.

¹⁷ Na nasempa kiang pan na maitang seel kei inla, kei cimawh ka hih ciangin hong dawng meng in.

¹⁸ Kei kiangah hong nai inla, kei hong hon in. Ka galte’ khutsung pan kei hong khah in!

¹⁹ Keimah hong kisimmawhna, ka maizumna le ka mindaina nang na thei a, ka galte khempeuh zong nang na thei hi.

²⁰ Simmawhna in ka lungsim hong zo a, kei ka cimawh ta hi. Kei a hong hehpih ding mi ka zonzon hangin kuamah om lo a, hong huh ding ka zon hangin kuamah ka mu kei hi.

²¹ Amaute in an dingin gu hong pia uh a, ka dangtakna-ah dawn dingin tuithuk hong pia uh hi.

²² Amau’ mai-a kilui ante thangzak suaksak inla, amau’ biakna pawi ante tehlop suaksak in.

²³ Khua a muh theih loh nadingun amau’ mit mialsak inla, a kawngte uh zawcipsak in.

²⁴ Amaute tungah nangma thangpaihna sungsuk inla, na sinsona amaute bansak in.

²⁵ Amaute’ phualpi a kilawi mun suak hen la, amau’ bukah mi khat zong tengsak kei in.

²⁶ Bang hang hiam cih leh nangmah in na satgawp mi amaute in bawlsia uh a, nangmah in na liamsaksa mi amaute in gimsak sawnsawn uh hi.

²⁷ Amau’ gim thuakna banah thuaksak thuahthuah lai inla, nangma tung panin suahtakna ngah kei ta uh hen.

²⁸ A nungtate’ laibu sung panin amaute kiphiatsak inla, miphate lakah a min uh kikhumsak kei in.

²⁹ Ahih hangin keimah in gimna thuakin na ka sa hi. Pasian aw, kei hong kaito-in hong honkhia ta in.

³⁰ Lasakna tawh Pasian’ min ka phat ding a, lungdamna tawh amah ka pahtawi ding hi.

³¹ Hih banga hihna in bawngtal tawh biakna ahi a, bawngtalno tawh biakna sangin zong Topa lungdamsak zaw ding hi.

³² Netniamna a thuakte in hih thu mu-in lungdam uh hen. Pasian a zong note aw, na lungsim uh nosuaksakkik un.

³³ Bang hang hiam cih leh Topa in a cimawhte’ aw za a, henna sungah a om a mite simmawh lo hi.

³⁴ Vantung le leitung, tuipi le a sungah a om khempeuhte in amah phat ta uh hen.

³⁵ Bang hang hiam cih leh Pasian in Zion honin Judah khuapite lamkik ding a, a nasemte tua lai-ah tengin tang pah ding uh hi.

³⁶ Ama nasemte’ tate in tua leitang luah ding uh a, amah a itte tua sungah teng ding uh hi.