Late 65 - Tedim Bible

Leitang a Hoihsak Pasian Phatna

¹ Pasian aw, Zion-ah nangmah phat dingin kilawm a, nangma tunga thuciamsate hong kitungsak ding hi.

² Thungetna a zapa na hi a, mawhna hangin nangma kiangah mi khempeuh hong pai ding uh hi.

³ Ka mawhnate un kote hong zawh ciangin, nangmah in tuate na hong maisak hi.

⁴ Nangma inn-ah a om dingin na teel na lakte mi nuamsa ahi hi. Nangma biakinn siangtho, na innsunga hoihna tawh kote ka lungkim ding uh hi.

⁵ Tuipi gamla pente le leimong khempeuhte’ lamet, kote a hong honkhia Pasian,

⁶ a thahatna tawh mualte a bawl, vangliatna tawh a kidim,

⁷ tuipi gingte, tuihualte, mi gamlumte a daisak pa aw,

⁸ leimong peka omte in na hihna limte a kihtak nadingun a kihtakhuai gamtatna zangin, nong hotkhiatna tawh kote’ ngetna nong pia hi. Nisuahna le nitumna kikalah a om mi khempeuhte lungdamna tawh a awng dingin na bawl hi.

⁹ Nangmah in leitung enin, guah na hong zusak a, leitung a hoihna nakpitakin na behlap hi. Pasian’ gunpi tui tawh kidim a, leitungah an na piangsak hi. Tua bangin nangmah in na khempeuh na bawlkhol hi.

¹⁰ Tu-ma-kuakte khempeuh tui tampi tak na buak a, leivumte zalhmai-in, guahtui tawh na nipsak a, a po kungte thupha na pia hi.

¹¹ Nangma hauhna tawh kum na phasak a, na leeng paina khempeuhah sathau a taak hi.

¹² Ganhing tatna, a noptuak mahmah munte-ah ganhing honte omin, mualte khempeuh zong lungdamna tawh kidim a,

¹³ gamlak lonona munte tuuhon tawh kizemin, kuampite an tawh kidim a, amaute lungdamin awngin la a sa khawm uh hi.