Late 64 - Tedim Bible

Galte pan Hut ding Ngetna

¹ Pasian aw, ka thumna aw hong za inla, gallauna panin kei hong kem in.

² Migilote’ sawmsimna, thusia bawlte’ vaihawmna,

³ namsau taat bangin a leii uh a taatte, thaltang bangin thu hoih lo a ngimte,

⁴ a buk simna panun mawhbaang lo mi a kapte, lau hetloin thakhatin amah a kapte’ kiang panin kei hong liah in.

⁵ Amaute in thusia bekbek ngaihsun niloh uh hi. Amaute in thangsiah sim ding gen uh a, “Eite kua in hong mu ding ahi hiam?

⁶ Eite’ mawhna kua in phawkzo ding ahi hiam? Siam mahmahna tawh i sawmsimna i vaihawm hi,” ci-in a ngaihsun uh hi. Bang hang hiam cih leh mihingte’ sung thu le a lungsim ngaihsutna uh thuk mahmah hi.

⁷ Ahih hangin Pasian in a thaltang tawh amaute kapgawp ding a, amaute khempeuh thakhatin liam ding uh hi.

⁸ Amau’ kampaunate hangin amaute siatna thuaksak ding a, amaute a mu khempeuh in a lu uh peisan ding uh hi.

⁹ Tua ciangin mi khempeuh lau ding uh hi. Amaute in Pasian’ hihsa thute gengen ding uh a, ama hihsa nate khempeuh ngaihsunsun ding uh hi.

¹⁰ Topa’ nasepna hangin midikte lungdam ding uh a, amah a bel ding uh hi. Lungsim thutangte khempeuh in amah a phat ding uh hi.