Late 62 - Tedim Bible

Pasian’ Hut ding Muanna

¹ Dai dide-in Pasian bek ka ngak a, ama hong hotkhiat ding muangin ka om hi.

² Kei hong huhpa le hong honpa amah bek hi a, ka guallel ngei kei ding hi.

³ Note khempeuh in kawm a hoi tawh a kibang, gawl bangin a kiling mi khat a susia dingin bang tanvei hih huan nilohin, susia ding na hi uh hiam?

⁴ Amah a zaliatna panin sukniam ding bekbek amaute in a sawm uh hi. Amaute in thuman lo-ah nuamsa mahmah uh hi. Amaute in a kampi uh tawh phat khem uh a, ahih hangin a sungtawng uhah samsiat uh hi.

⁵ Amah bek ka muan ahih manin, daitakin Pasian bek ka ngak hi.

⁶ Kei hong hupa le hong honpa amah bek mah hi a, ka guallel ngei kei ding hi.

⁷ Keima suahtakna le ka minphatna Pasian’ hang ahi hi. A muanhuai ka belh pa, ka bukna Pasian ahi hi.

⁸ Mite aw, amah muang tawntung unla, na lungkhamna teng uh ama tungah gen un. Pasian, eite’ bukna ahi hi.

⁹ Mihingte ahihleh husan’ bang bek hi a, a lian a neu kibang lel hi. Tawi a kikhai ciangin amaute in leek lo uh a, amaute a kigawmin husan’ sangin zangzaw hi.

¹⁰ Zawhthawh thu tawh ngahna muanin nei kei inla, suhgawpnate lametin nei kei in. Na hauhna a khan leh, tuate muanin nei kei in.

¹¹ Vangliatna pen keima a’ hi, ci-in Pasian in a genna ka zak ngeingeisa ahi hi.

¹² Topa aw, itna kip nangma a’ ahi hi. Bang hang hiam cih leh a sepna bang ciatin mite na thuk hi.