Late 60 - Tedim Bible

Gal Lelhna-ah Thumna le Huh ding Ngetna

¹ Pasian aw, kote na hong nilkhia khin a, ka panmunte uh na sukham mang khin hi. Kote tungah nangmah na heh khin hi. Kote ka ngei uh hong bangsakkik ta in.

² Nangmah in lei na lingsak khin a, lei na khangkhamsak khin hi. Kip lo ahih ciangin a kitam mate matkik in.

³ Nangmah in na mite a haksa na thuaksak khin hi. Ka dawn dingun ko a hong hoisak leenggahzu na hong pia khin hi.

⁴ Thalte panin kihemin a kikaihkhop nadingun nang hong zahtakte a dingin dial khat na koih khin hi.

⁵ Nangma it mite a suahtak theih nadingin na khut taklam tawh gualzawhna pia inla, kote’ ngetna hong pia in.

⁶ A biakinn sungah Pasian in thu gen a, “Gualzo a lungdamna tawh Shekhem gam khenkhia-in Sukkoth gam kuam ka sehkhia ding hi.

⁷ Gilead gam keima a’ hi a, Manasseh gam zong keima-a’ mah ahi hi. Efraim gam ka siklukhu hi a, Judah gam ka ciangkhut ahi hi.

⁸ Moab gam ka kisilna kuang hi a, ka neihsa hi cih lahna limin Edom gam tungah ka khedap ka lawn a, Filistia gam tungah gualzawhna tawh ka awng hi,” a ci hi.

⁹ Kua in khuapi muanhuai-ah kei hong paipih ding hiam? Kua in Edom gamah kei hong paipih ding hiam?

¹⁰ Pasian aw, nangmah in kote a hong don nawn lo khinta hi lo na hi hiam? Pasian aw, komau’ galkapte tawh na hong kuankhia kei hi.

¹¹ Ka galdona uhah huhna hong pia in; bang hang hiam cih leh mihing’ huhna a mawkna hi.

¹² Pasian tawh khauhtakin i hih ding hi. Amah pen i galte hong sikcipsak ding pa ahi hi.