Late 53 - Tedim Bible

Mite’ Haina le Gitlohna

¹ Mihai in a lungsim sungah, “Pasian om lo hi,” ci-in ngaihsun hi. Amaute sia uh hi. A kihhuai-in gamta uh a, a hoihin a gamta kuamah om lo hi.

² A pil, Pasian a zong mi a om uh hiam, cih a theih nadingin Pasian in vantung panin mihingte hong ensuk hi.

³ Amaute khempeuh a vekpi-un pukkhin uh hi. A kibangin kisia kim uh a, a hoihin a gamta khat beek om lo hi.

⁴ Pasian tungah thu a ngen lo, an nek bangin ka mite a netum, siatna a bawlte in thu theihtelna nei lo ahi hiam?

⁵ Cikmahin tua bang launa a om ngei lo, launa lianpi sungah amaute om uh hi. Bang hang hiam cih leh Pasian in migilote’ guhte thehthang ding hi. Pasian in amaute nial ahih manin, amaute maizumin kikoih ding hi.

⁶ Zion panin Israel-te a’ ding hotkhiatna hong tunna ding thu ka ngenngen hi. Pasian in ama mite tungah nopsakna a piakkik ciangin, ama mi Israel-te kipak mahmah ding uh hi.