Late 47 - Tedim Bible

Pasian, Leitung Bup Kumpi Ahihna ah Minamkimte’ Lungdamna

¹ Mi khempeuh aw, na khut uh beeng un! Lungdamna la nakpi-in sa-in Pasian phat un.

² Bang hang hiam cih leh Topa, a Sangpenpa, dipkuathuai a, leitung khempeuh a uk kumpi lian khat ahi hi.

³ Mi khempeuh eima nuai-ah, minamte i khenuai-ah amah in hong zawhsak hi.

⁴ Ama it Israel-te’ angtanpih eima luah ding leitang amah in hong teelsak hi.

⁵ Awging tawh Pasian paito a, peengkul aw tawh Topa paito hi.

⁶ Pasian tungah phatna la sa un, phatna la sa un! I Kumpipa tungah phatna la sa un, phatna la sa un!

⁷ Bang hang hiam cih leh Pasian pen leitung khempeuhte’ kumpi ahi hi. La sakna tawh amah phat un!

⁸ Pasian in minamte uk a, a tokhom siangtho tungah Pasian tu hi.

⁹ Uliante le Abraham’ Pasian’ mite kipawl khawm uh hi. Bang hang hiam cih leh leitung mite’ lumte khempeuh Pasian-a’ suak khinta a, amah a sangpi-in kithangsak hi.