Late 46 - Tedim Bible

Pasian, Ama Mite’ Belh

¹ Pasian, i belh leh i thahatna hi a, haksat hunin a hong huh pahpah pa ahi hi.

^2-3 Tua ahih ciangin, leitung kikhinin, mualte tuipi sung a kidenna zongin, a tuite ging zuazua-in phuan zuazua a, hih ginna hangin mual liante a ling zongin, i lau kei ding hi.

⁴ Sangpenpa’ tenna khua siangtho, Pasian’ khuapi, a lungdamsak gun khat a om hi.

⁵ Ama laizangah Pasian om a, amah a kiling kei ding hi. Pasian in phalvak tungin amah huh ding hi.

⁶ Minamte lungkham uh a, kumpi gamte kiling hi. Ama aw gingkhiasak a, leitung kicimgawp hi.

⁷ Vanglian Topa eite tawh hong omkhawm a, Jakob Pasian eima belh ahi hi.

⁸ Hong pai unla, Topa’ sepna hong mu un. Leitung khempeuh gamkhing a suahsak khitna hong en un.

⁹ Amah in leimong dongah gal beisak hi. Amah in thalpi kuaitanin teipi susia a, leengte mei tawh a haltum hi.

¹⁰ “Om hithiat unla, Pasian ka hihna thei un. Minamte lakah keimah hong kisangsak a, leitung khempeuhah ka min hong kithangsak hi,” a ci hi.

¹¹ Vanglian Topa, eite tawh hong omkhawm a, Jakob’ Pasian, eima belh ahi hi.