Late 45 - Tedim Bible

Kumpi Mopina Pawi La

¹ Thubul hoih khat tawh ka lungsim hong dimletin, kumpipa la ka phuah a, ka leii pen laithei pa’ laikung tawh hong kibang hi.

² Mihingte lakah nangmah na hoihpen a, thugen na siam a, na kam khum zungzung hi. Tua ahih manin Pasian in nang thupha hong pia tawntung hi.

³ Vanglian kumpipa aw, na minthanna le na liatna tawh na namsau kuah in.

⁴ Thumanna a omna ding le thuman a hu dingin na minliatna tawh gualzo-in hong pusuak inla, dipkuathuai hihnate na taklam khut nangmah kihilhsak in.

⁵ Kumpipa’ galte’ lungtangah na thaltang hiamte lut a, mite na nuai-ah puk uh hi.

⁶ Na kumpi tokhom siangtho kip tawntung hi. Na kumpi ciangkhut thumanna ciangkhut hi a,

⁷ thuman deihin gitlohna na mudah hi. Tua ahih ciangin Pasian ahi, nangma Pasian in na khangualte tungah a kikhai to-in lungdamna sathau nang hong nilhzo a,

⁸ na puantualpite myrrh paknamtui, aloes paknamtui, le thalsing namtuite a nam hi. Saiha tawh kibawl innpite panin khausai lasaknate in nang hong lungdamsak a,

⁹ kumpite’ tanute, numei uliante lakah om a, na taklamah Ofir gam khamte tawh kizemin kumpinu a ding hi.

¹⁰ Tanu aw, ngai dih in; ngaihsun inla, na bil hong ngat in. Na mite le na behte mangngilh in.

¹¹ Na melhoihna hangin kumpipa in hong deih ding hi. Na topa ahih ciangin ama mai-ah kun in.

¹² Mi haupen ahi Taia mite in na manpha namkim letsong tawh nang hong maivil ding uh hi.

^13-14 Kumpi tanu a inndei sungah kham puantualpi tawh kizem a, mel tuamtuam a nei puantualpite silh a, mihon kigual deudaute lakah a kithuahpih nungakte le amah a khate tawh kumpipa kiangah kipaipih hi.

¹⁵ Kumpipa’ inn-ah a tun ciangun lungdamna le nuamna tawh amaute kitumpih hi.

¹⁶ Na pate’ tang ding na tapate hong hi ding a, nangmah in leitung khempeuhah amaute, ulian na suaksak ding hi.

¹⁷ Keimah in khang tawntungin na min ka kiphawksak ding hi. Tua ahih ciangin mite in nang hong phat den ding uh hi.