Late 43 - Tedim Bible

Biakinn-ah Ciahkik ding Lamenin Thungetna

¹ Pasian aw, ka dikna hong langsak inla, migilote tawh ka thu-ah kei hong panpih in. Mi khemte le thutang lote kiang panin kei hong honkhia in.

² Bang hang hiam cih leh ka hong belh Pasian na hi hi. Bang hangin kei hong nilkhia na hi hiam? Galte’ sukcip manin bang hangin kapin kidikdik ka hi hiam?

³ Na khuavak le na thuman hong sawlkhia inla, na mual siangtho, na omna-ah kei hong paipih sakin, hong khasak in.

⁴ Tua ciangin na biakna tau-ah ahi a, ka lung a hong damsak Pasian kiangah ahi zongin ka pai ding a, laiza khausai lasakna tawh nang ka hong phat ding hi, aw Pasian, ka Pasian aw.

⁵ Bang hangin khakunkun a, lunghimawh niloh ka hi hiam? Pasian sungah lametna nei ning; bang hang hiam cih leh kei a hong huh ka Pasian ka phatkik ngawn ding hi.