Late 40 - Tedim Bible

Phatna tawh Biakna le Pasian’ Huh Baih ding Ngetna

¹ Topa lamenin ka ngak ngiungeu a, amah kei lam hong nga-in ka kikona aw hong za hi.

² Dahna dum sung, buannawng panin kei hong kaikhia-in suangpi tungah ka khete nga a, ka khesikna mun a muanhuaisak hi.

³ Eima Pasian phatna la thak keimah hong hilh hi. Mi tampite in hih thu mu-in amah zahtak ding uh a, amaute khempeuh in Topa muang ding uh hi.

⁴ Topa a muang a, mi kiphasakte lamah a kihei lo, pasian man lote lamah a pialkhia lo mi thupha ngah ahi hi.

⁵ Topa ka Pasian aw, na sep a lamdangte le ko a dingin na ngaihsutnate tampi tak na phasak a, kuamah dang tawh tehtheih na hi kei hi. Tuate pulakin gen ding hi leng, genkhit zawh ding hi lo hi.

⁶ Gan gawh biakna le khawhsa tawh biakna na deih kei a, khua ka zak theih nading bil na hong guan hi. Meihal biakna le mawhmaina ding biakna zong na kulsak kei hi.

⁷ Tua ciangin keimah in, “En in, laibu sungah keima thu a kigelh khinsa bangin ka hong pai hi.

⁸ Nangma deih bang hihna-ah nuam ka sa hi, ka Pasian aw. Nangma thukham ka lung sungah om hi,” ka ci hi.

⁹ Hotkhiatna hangin lungdam thu mihonpi lakah ka gen ding hi. Topa aw, lungdam thugen ka khawl ngei kei ding hi.

¹⁰ Nangma hotkhiatna thu ka im kei a, na thumanna le na hotkhiatna ka gen khin hi. Na itna kip le na thumanna mihonpi tungah ka im kei hi.

¹¹ Topa aw, na hehpihna kei kiang panin humcip kei inla, na itna kip le na thumanna kei a hong kem tawntung ding hisak ta in.

¹² Bang hang hiam cih leh a malin simzawh loh ding siatna tampite in kei hong umcih a, khua a hong musak thei lo zah dong dingin ka mawhna thaman ka thuak khinta hi. Amaute ka sam mal sangin tamzaw uh a, ka lung in a lel ta hi.

¹³ Topa aw, keimah hong honkhia nuam in. Topa aw, hong huh meng in.

¹⁴ Kei a hong that nuamte zahhuaisak inla, maisiasak in. Keima siatna ding a deihte nungkiksak inla minsiasak in.

¹⁵ Keima tungah, “Ha ha!” hong ci vialte zahhuaina tawh maikhingsak in.

¹⁶ Ahih hangin nang a hong zongte khempeuh nangma hangin nuamin kipak hen la, na hotkhiat ding a deihte in, “Topa lian hi!” ci ngitnget ta uh hen.

¹⁷ Kei ahihleh zawngin ka cimawh a, ahih hangin Topa in kei hong mangngilh lo hi. Nang pen kei hong huhpa le hong honkhia pa na hi hi. Zekai kei in, ka Pasian aw.