Late 38 - Tedim Bible

Gimna a Thuak, a Kisik mipa’ Thungetna

¹ Topa aw, a hehsa-in kei hong taii kei inla, lungsosa in kei hong thuhilh kei in.

² Bang hang hiam cih leh nangma thaltangte ka sungah hong tum khin a, ka tungah na khuttum hong tu khinta hi.

³ Nangma hehna hangin kei ka ci na a, ka mawhna hangin ka pumtangin ka na hi.

⁴ Bang hang hiam cih leh ka mawhnate in ka lu dong hong tuumzo a, keima puak dingin a giklua vangik tawh kibang hi.

⁵ Ka haina hangin ka liamnate nai-in uih a,

⁶ keimah hong kikunsak a, hong kibokcipsak hi. Sunthapai-in kapin ka vak kawikawi hi.

⁷ Bang hang hiam cih leh ka ci sa mahmah a, nakpitakin ka ci na hi.

⁸ Kei hong kinengcip gawpin ka thahatna beimang khin a, ka lungsim gimna hangin thumin ka tautau hi.

⁹ Topa aw, ka deihna khempeuh na thei a, ka khuisatnate na za hi.

¹⁰ Ka lungtang kisat a, ka tha in lel hi. Ka mit in zong khua mu thei nawn lo hi.

¹¹ Ka gim thuakna-ah ka lawmte le ka kithuahpihte kidang koih uh a, keima behte nangawn kei kiang pan gamla om uh hi.

¹² Kei a hong that nuamte in a thang uh zak a, kei’ natna ding a zongte in siatna ding thu bek gen uh a, sunthapai-in khemna bekbek ngaihsutin nei uh hi.

¹³ Ahih hangin kei pen bilngong ka bang a, khua ka za kei hi. A kam a ka thei lo, a pau thei lo mi ka bang hi.

¹⁴ Bil khua za lo, tawnna kam a za thei lo mi khat tawh kei ka kibang takpi hi.

¹⁵ Ahih hangin Topa aw, nangmah ka hong muang hi. Topa ka Pasian aw, a hong dawng ding pa nangmah na hi hi.

¹⁶ Bang hang hiam cih leh, “Ka khe a taal ciangin kei tunga hong kihisakte, keima gim thuakna-ah lungdam sak kei in,” cih bek ka hong thum hi.

¹⁷ Bang hang hiam cih leh puk dingin ka kithawi a, ka gimna kam tuan lo hi.

¹⁸ Ka thuman lohna ka pulak a, ka mawhna hangin ka dah hi.

¹⁹ A thuman lopi-in ka gal a hite thahat a, kei a hong mudah khialte tam mahmah uh hi.

²⁰ A hoih gamta ka hih manin ka hoihna pen siatna tawh a hong thukte ka langpangte ahi hi.

²¹ Topa aw, kei hong nusia kei in. Ka Pasian aw, ka kiang pan gamla om ke’n!

²² Topa, kei hong honpa aw, keimah a hong huh dingin hong manlang in.