Late 36 - Tedim Bible

Mihing’ Gitlohna le Pasian’ Itna

¹ Mawhna in migilo pa’ lungsim tawngah thu gen a, amah in Pasian zahtakna nei het lo hi.

² Bang hang hiam cih leh ama mawhna kidawkkhia lo a, muhdahna thuak lo ahih manin amah kimawkphat tawm hi.

³ Ama kammalte pen siatna le khemna vive hi a, pil gamtatna le hoih gamtatna bei khinta hi.

⁴ A lupna tungah lumin siat gamtat ding a ngaihsun hi. Hoih lohna lamah amah kibulhtawm a, amah in siatna nolh lo hi.

⁵ Topa aw, na itna kip in vantung ban a, na cihtakna in vanpi dong banto hi.

⁶ Na thumanna pen Pasian’ mualte tawh kibang a, na thukhennate pen tuipi thuk tawh kibang hi. Mihing le ganhing na hon hi, Topa aw.

⁷ Pasian aw, na itna kip manpha mahmah hi. Mihing tate na kha liimah bu uh hi.

⁸ Na inn sunga na tampite tawh amaute nuamsa uh a, na hoihna gun panin amaute na dawnsak hi.

⁹ Bang hang hiam cih leh nuntakna tuinak nangmah tawh om a, na khuavak sungah kote in khuavak ka mu uh hi.

¹⁰ Nang hong theite tungah na itna kip hong zom inla, lungsim thutangte tungah na hotkhiatna hong zom in!

¹¹ A kihisak mite kei hong sukhasak kei inla, migilote, hong hawlkhiasak kei in.

¹² Hua lai-ah siatna bawlte a cimawhin kun uh a, amaute kisuncip sukin, thozo nawn lo uh hi.