Late 34 - Tedim Bible

Lungkhamna pan Hotkhiat Manin Phatna

¹ Topa ka phat tawntung ding a, amah phatna ka gengen ding hi.

² Topa ka phat ding hi. Gimna thuakte zasak unla, lungdam uh hen.

³ Kei tawh Topa nak phat un, ama min pahtawi khawm ni!

⁴ Keimah in Topa ka zong a, amah in kei hong dawngin, ka launa khempeuh panin kei hong honkhia hi.

⁵ Amah en unla, maitai un; tua hileh na mai uh zum ngei lo ding hi.

⁶ Hih mi hehpihhuai pa kiko-in, Topa in amah za a, ama haksatna khempeuh panin amah a honkhia hi.

⁷ Amah a zahtakte’ kiimah Topa’ vantungmi in giahphual sat a, amaute a honkhia hi.

⁸ Topa tawh kikhawl phot unla, ama hoihna thei un! Amah a beel mite mi lungdam ahi uh hi.

⁹ Ama mi siangthote aw, Topa zahtak un; bang hang hiam cih leh amah a zahtak mite in kitangsapna nei lo hi.

¹⁰ Humpinelkai khanglaite in kisapna le gilkialna thuak a, ahih hangin Topa a zongte in na hoih a kisap uh om lo hi.

¹¹ Tate aw, hong pai unla hong ngai un; Topa zahtakna thu ka hong hilh ding hi.

¹² Nopna a neih theih nadingin nuntakna le khansau a deih kua ahi hiam?

¹³ Siatna ding panin na leii kem inla, zuau genna panin na muk kem in.

¹⁴ Siatna panin kihemkhia inla, a hoih bawl in. Kilemna ding hanciam inla, na phak mateng delh in.

¹⁵ Topa’ mit in thuman mite’ lam en a, amau’ kikona lamah a bil a ngat hi.

¹⁶ Siatna a bawl mite hih leitung panin a kiphawkna a kisuktat nadingin Topa in amaute a langpang hi.

¹⁷ Huhna a ngen dingin thumante a kiko ciangin Topa in za a, a haksatna khempeuh panun amaute a honkhia hi.

¹⁸ Lungsim kitamzante kiangah Topa hong om a, lungsim zangawpte a hon hi.

¹⁹ Thuman mi’ thuakna a tam mahmah hangin tuate khempeuh panin Topa in amah a hon hi.

²⁰ Amah in thuman mipa kem a, a guh khat zong kitan lo hi.

²¹ Siatna in migilote that ding a, thuman a mudah mite gim kipia ding hi.

²² Topa in ama nasemte honkhia a, amah a bel mi khat beek gim kipia lo ding hi.