Late 32 - Tedim Bible

Mawh Maisakna hanga Thupha

¹ Ama khialhna kimaisak a, ama mawhna a kiselcipsak mi, thupha ngah ahi hi.

² Topa in mawhna a khuksak loh mi, a lungsim sungah khemna a om lo mi, thupha ngah ahi hi.

³ Ka mawhna ka pulak loh ciangin, sunthapai ka tautauna hangin ka pumpi a thaneem hi.

⁴ Sun le zan tawntung gim nong piakna ka thuak a, khuakhal nisa’ kat bangin ka thahatna a keucip hi.

⁵ Keima khialhnate nangma tungah kong pulak a, ka mawhna ka im kei hi. “Ka khialhnate khempeuh Topa’ tungah ka pulak ding hi,” ka ci hi. Tua ciangin ka mawhna nin nong maisak hi.

⁶ Tua ahih ciangin nang hong kimuh theih lai-in mihoih khempeuh, nang tungah thu kingensak in. Tua hileh tuikhang in amaute ban lo ding hi.

⁷ Nang pen kei a dingin ka bukna mun na hi a, haksatna pan kei hong kemin hotkhiatna kicing nong pia hi.

⁸ Na pai nading lampi lakin ka hong hilh ding a, ka mit tawh hong enin thu kong hilh ding hi.

⁹ A kamkaih tawh uk lohin a phamawh, thutheihna a nei lo, sakol le la bang kei in.

¹⁰ Migilote in gimna tampi thuak uh a, Topa a muangte ahihleh itna kip in a hu hi.

¹¹ Thumante aw, Topa tungah lungdamin kipak un. Lungsim man mi khempeuh aw, lungdamin awng un!