Late 29 - Tedim Bible

Huihpi Sungah Topa’ Awging

¹ Topa-a’ ci un, van mite aw; minthanna le hatna Topa-a’ ci un.

² Ama minthanna Topa’ tungah pia unla, a siangtho kizepna tawh Topa bia un.

³ Topa’ awging tuipite tungah kiza hi. A minthang Pasian’ aw ging damdam a, tui tampite tungah Topa’ aw kiza hi.

⁴ Topa’ awging vanglian a, Topa’ awging, liatna tawh kidim hi.

⁵ Topa’ awging in taamtak singte kitansak a, Topa’ awging in Lebanon mual taamtak singte a kuaitan hi.

⁶ Lebanon mual le Sirion mualte bawngno le gamsialno bangin amah in a diangsak hi.

⁷ Topa’ awging in meikuang taangkhia sak hi.

⁸ Topa’ awging in gamlak lok a, Topa in Kadesh gamlak lok hi.

⁹ Topa’ awging in singkungte heekgawp a, gammang tulak hawkkhia-in a kolhsak hi. Ama biakinn sungah a vekpi-un awngin, “Pasian’ min thang ta hen,” a ci uh hi.

¹⁰ Topa in tui thukpite uk a, a tawntung kumpi hihna tawh Topa a tu hi.

¹¹ Topa in ama mite tungah thahatna pia tahen. Topa in ama mite tungah nopsakna thupha pia tahen.