Late 27 - Tedim Bible

Topa, ka Khuavak le Hong Honpa

¹ Topa, ka khuavak le hong honpa ahi hi. Kua kihta ding ka hi hiam? Topa, kei a dingin munmuanhuai ahi hi. Bang laupih ding ka hi hiam?

² Hong langpangte le ka galte ahi, siatna bawlte in hong do a, kei nektum hong sawm ciangun, amaute kisukha-in puk ding uh hi.

³ Mi honkhat in keimah hong langpangin phual a sat uh hangin, ka lungsim lau lo ding hi. Keimah hong langpangin gal hong kuan hangin tua nangawnah ka lungmuang ding hi.

⁴ Topa’ tung panin na khat ka ngen khin a, tua ngenin ka zon ding pen: Topa’ inn sungah ka khan tawntungin om ding, Topa’ hoihna et ding le ama biakinn sungah thu dot dingte ahi hi.

⁵ Bang hang hiam cih leh haksat hun ciangin amah in a buk sungah kei hong seel ding hi. A puanbuk khuhna nuai-ah kei hong seel ding a, a sangna suang tungah kei hong koih ding hi.

⁶ Tu-in ka kimkotah a om ka galte tungah ka gualzo ding hi. Lungdamin kikona tawh ama buk sungah biakna ka pia ding a, la ka sa ding hi. Topa tungah la ngaih ka sa ding hi.

⁷ Topa aw, ka otna aw hong za inla, kei hong hehpihin hong dawng in!

⁸ “Ka mai hong zong in,” na hong ci khinzo hi. Keimah in nangma tungah, “Topa aw, nangma mai kong zong hi,” ka hong ci hi.

⁹ Kei kiang panin na maitang seel kei in. Hehpihna tawh na nasempa hong hawlkhia kei in; kei hong nei pa na hi hi. Hong paaikhia kei inla, hong nusia kei in, kei hong honkhia Pasian aw.

¹⁰ Bang hang hiam cih leh ka nu le ka pa in hong nusiat hangin Topa in kei hong kem ding hi.

¹¹ Topa aw, na lampi hong hilh inla, ka galte’ hangin lam phei-ah kei hong kha in.

¹² Ka langte’ deihna bangin kei hong nusia kei in; bang hang hiam cih leh teci man lote ka langah pang khin a, amaute in zuau genin kei hong tawng niloh uh hi.

¹³ A hingte’ gam sungah Topa’ hoihna a mu dingin kei ka ki-um hi.

¹⁴ Topa muang in. Thakhauh inla, na lungsim hangsakin, Topa muang in.