Late 2 - Tedim Bible

Topa’ Sathau Nilh pa’ Ukna

¹ Bang thu hangin minam dangte siatna dingah kithukhat sim uh a, mite in a mawkna dingpi-in sawmsim uh ahi hiam?

² Leitung kumpite le gam ukte in Topa le ama sathau nilh pa langpangin vaihawm uh a,

³ “Amau’ hong henna khaute sutat khia-in, amau’ khaute ei kiang panin paaikhia ni,” ci uh hi.

⁴ Vantunga a tupa in amaute na nuihsan a, tua Topa in amaute a zahko hi.

⁵ Tua ciangin hehna tawh amau kiangah thu gen ding a, hehluat mahmahna tawh amaute linglawng sakin,

⁶ “Ka mual siangtho Zion tungah ka kumpi ka tusak khin hi,” ci hi.

⁷ Topa’ thukhenna tu-in ka hong gen ding hi: Amah in keima tungah, “Nang pen ka tapa na hi a, tuni-in na Pa ka suak hi.

⁸ Keima tungah hong ngen in; nangma luah dingin minamte ka bawl ding a, leimong dongin na neihsa ka hisak ding hi.

⁹ Sik tawn khat tawh amaute na satkham ding a, beelseek pa in beel a denkhap bangin leilakah amaute na dengzan ding hi,” hong ci hi.

¹⁰ Tua ahih ciangin kumpite aw, tu-in pil ta un; leitung gam a ukte aw, tu-in thu phawk ta un.

^11-12 Launa tawh Topa’ na sem unla, linna tawh a khe nam un; tua hikeileh amah sinso-in lamkalah na siamang ding uh hi; bang hang hiam cih leh amah heh pakpak hi. Amah a bel khempeuh mi nuamsate ahi hi.