Late 19 - Tedim Bible

Nate le Ama Thu-ah Pasian’ Minthanna

¹ Vantung in Pasian’ minthanna gen a, vanpi in ama nasepna taangko hi.

² Nisimin thu gengen a, zan simin theihtelna pulaklak hi.

³ Pauna le kammal om lo a, amau’ aw kiza lo hi.

⁴ Ahih hangin a aw uh leitung khempeuhah kizel a, a kammal uh leimong dongah a tung hi. Amau’ sungah ni a’ ding omna khat bawl khin a,

⁵ a innsung pan a hong pusuak zi pi tangval tawh ahi zongin, lungtaii takin tai ding a kipan mi thahat khat tawh ahi zongin a kibang hi.

⁶ Ama suahna van mong pan hi a, mong khat dongin pai a, ama satna panin a kiliah thei bangmah om lo hi.

⁷ Topa’ thu kicing a, nuntakna a thaksuaksak hi. Topa’ teci panna hi takpi a, mi pillote pilsak hi.

⁸ Topa’ thuhilhte man a, lungsim nuamsak hi. Topa’ thupiakna siang a, mitte vaksak hi.

⁹ Topa a kizahtakna siang a, kip tawntung hi. Topa’ ngeina kipte thuman a, a vekin kituakin man kim hi.

¹⁰ Kham sangin ahi zongin kham hoihpen sang ahi zongin tuate deihhuaizaw a, khuaizu le khuailuzu taakte sangin zong khumzaw lai hi.

¹¹ Tua tham loin tuate’ hangin a nasem pa in thuphawkna ngah a, tuate zuihna-ah noptuamna lian a om hi.

¹² Ahih hangin kua in ama khialhnate mukhia theitawm ahi hiam? Theih loh manin khialhna panin kei hong siangsak hi.

¹³ Mawh kaltangnate panin zong na nasempa hong kem inla, tuate keima tungah hong uksak kei in! Tua ciangin kei ka kawkbaang kei ding a, mawhna liante panin ka siang ding hi.

¹⁴ Topa, ka belh suangpi le keimah hong tankhia pa aw, ka kammal le ka lungsim ngaihsutnate nangma muhna-ah a sanhuai suaksak ta in!