Late 144 - Tedim Bible

Hotkhiat ding le Cihtheihna ding Ngetna

¹ Ka khutte galdona ding ka khutmete galkap nadingin a hilh, keimah a hong hu, Topa in thupha ngah tahen.

² Amah pen ka suangpi le ka munkip muanhuai, ka kulhpi le hong honkhia pa, ka lum le ka belh pa, ka nuai-ah mite a zopa ahi hi.

³ Topa aw, nangmah in na hong phawk tham dingin mi pen bang hi a, nangmah in na hong ngaihsut tham dingin mihing’ tapa bang ahi hiam?

⁴ Mi pen husan’ khat tawh kibang a, ama hunte pen a tai dandan niliim tawh kibang hi.

⁵ Topa aw, na vanpite niamsak inla, hong paisuk in. Mualte lawng inla, meikhu suaksak in.

⁶ Khuaphialep phiasak inla, amaute kithehthang sak in. Na thaltangte lawn inla, amaute susia in.

⁷ A sangna mun panin na khut hong zan inla, tui lian lauhuaite le gamdang mite’ vangliatna panin hong honkhia in.

⁸ A kam uh tawh zuauthu a gente le limtakin kiciamna a bawl khit ciang nangawnin zuauthu mah a gen lai vevete’ kiang pan kei hong phel inla, hong honkhia ta in.

⁹ Pasian aw, la thak khat kong sak ding a, harp zangsawm khausai lasakna nang kong tum ding hi.

¹⁰ Kumpite tungah gualzawhna a piapa, na nasem David a honkhia pa na hi hi.

¹¹ A gilo galte kiang panin kei hong hon inla, a kam uh tawh zuauthu a gen limtakin kiciamna a bawl khit ciang nangawnin zuau a gen lai veve gamdang mite’ khutsung pan kei hong honkhia in.

¹² Ka tapate uh a tangval lai-in khang cingin a khauh mahmah singkungte bang ta hen la, ka tanute uh a nungak lai-in kumpi inn lamna dinga a kisui innkiu khuampite bang tahen.

¹³ Ka saalte uh a dimin an nam khempeuh om ta hen la, ka tuute uh a tultul a thenthen-in gamlakah suak tahen.

¹⁴ Ka kongzingte uhah cimawhin kikona om kei tahen.

¹⁵ Tua bang thupha a ngah mi mi lungdam ahi hi. Topa pen amau’ Pasian ahi mite pen mi lungdam ahi hi.