Late 142 - Tedim Bible

Bawlsiatna pan Hot ding Ngetna

¹ Topa’ hong huh ding ngenin ka kiko a, Topa’ tungah ka thum hi.

² Ama mai-ah ka lungkim lohna ka sung a, ama mai-ah ka haksatna teng ka gen hi.

³ Ka cih nading ka theih nawn loh ciangin, amah in ka mailam ding hong theihsak hi. Ka paina lampi-ah ka galte in tehlop khat tawh kei hong siah uh hi.

⁴ Ka kiim ka pam khuadakin ka en kawikawi a, ahih hangin kei hong huh ding kuamah om lo hi. Ka belh ding kuamah om lo a, kuamah in kei hong don lo hi.

⁵ Topa aw, nang tungah kong kiko hi. Nang pen keima belh na hi a, a hingte’ leitangah keima tanh na hi hi, ka hong ci hi.

⁶ Ka kikona hong ngai in. Bang hang hiam cih leh nakpitakin kei hong kiniamkoih suk hi. Kei hong bawlsiate’ kiang pan hong honkhia in. Bang hang hiam cih leh kei a dingin amaute hatlua uh hi.

⁷ Thong sung panin kei hong lakhia in. Tua ciangin nangma mite tawh kong phatkhawm ding uh hi. Bang hang hiam cih leh itna lianpi tawh kei tungah nong gamta hi.