Late 140 - Tedim Bible

A Ngongtatte’ Kiang Pan Hut Ding Ngetna

¹ Topa aw, migilote kiang panin kei hong honkhia inla, mi ngongtatte kiang panin kei hong kem in.

² Amaute in a lung sung uhah thusia geelgeel uh a, gal phuang ngitnget uh hi.

³ A leii uh gulpi leii bang a, a thugente uh gulgu bang hi.

⁴ Topa aw, migilote’ khutsung panin kei hong cing inla, kei, sukpaih ding a hong sawm mi ngongtatte kiang panin kei hong kem in.

⁵ Mi kiphasakte in keimah hong siahna-in tehlop tung sim uh a, amaute in ngenthang zakin lam gei-ah thangzak tawh kei hong siah uh hi.

⁶ Topa’ tungah hih bangin ka ci hi: Nang pen keima Pasian na hi hi; ka thumna awte hong ngai in, Topa!

⁷ Topa, keima Topa, a thahat hong honkhia pa aw, galkidona sungah keimah nong hu hi.

⁸ Topa aw, migilo pa’ deihnate tangtungsak kei inla, ama thusia sawmna a maban sotsak kei in!

⁹ Kei hong umcih mite gualzosak kei inla, kei hong sawmnate uh amau’ lu tung mah tusak in!

¹⁰ Amaute tungah mei-am kuang zusak in. A thokikzo nawn lo dingin dum sungah amaute kiasak in!

¹¹ Mi gensia pa leitungah mavangsak kei inla, mi ngongtat pa pen thusia in sulzuih ta hen!

¹² Topa in gimna a thuak mite’ thu a panpihna, mi cimawhte a dingin thu a manin a khenna ka thei hi.

¹³ Thuman mite in nangma min hong phat pelmawh ding uh a, lungsim thutangte pen nangma omna-ah teng ding uh hi.