Late 132 - Tedim Bible

Pasian’ Inn Deihna

^1-5 Topa aw, David na ngaihsutna-in a gim thuaknate khempeuh le amah in, “Jakob’ Vanglianpa’ tenna ding, Topa a’ ding mun ka muh matengin ka inn sungah ka lum kei ding a, ka lupna ka zuan kei ding hi. Ka ihmu kei ding a, ka mitkhute ka kikhupsak kei ding hi,” ci-in Jakob’ Vanglianpa’ tungah hong thuciamna le Topa’ tungah hong kiciamnate phawk in.

⁶ Jaar gam sungah Thuciamna Singkuang ka mu uh hi, cihna thuthak Bethlehem-ah kiza hi.

⁷ “Ama omna munah va pai ni; ama khengakna-ah va bia ni,” ka ci uh hi.

⁸ Topa aw, tho inla na vangliatna lim Thuciamna Singkuang tawh na omna munah pai in.

⁹ Na mite na hotkhiatna thu, na siampite in taangko hen la, na mi siangthote lungdamin awng ta uh hen.

¹⁰ Na nasempa David tungah thu na ciamzo hi; na sathau nilh pa nial kei in.

¹¹ Topa in a pelh loh ding kiciamna taktak khat David tungah kiciam a, “Nang’ sung pana na tate khat na kumpi tokhom tungah ka koih ding hi.

¹² Na tate in, amau’ tungah ka hilh ding ka thuciamna le ka teci pannate a zuih nak-uhleh, amau’ tate zong na kumpi tokhom tungah tu paisuak ding uh hi,” na ci hi.

¹³ Bang hang hiam cih leh Topa in Zion teel khinzo a, amah in tua mun pen ama ten nadingin a deih hi.

¹⁴ “Hih mun pen ka om tawntungna ding ahi hi; hih mun deih ka hih manin hih lai-ah ka teng ding hi.

¹⁵ Ama beemlepang thupha tampi ka pia ding a, a mizawngte an ka vak kham ding hi.

¹⁶ Ka hotkhiatna thu, a siampite ka taangkosak ding a, a mi siangthote lungdamin la sa-in awng ding uh hi.

¹⁷ Keimah in tua lai-ah David’ suanlekhakte kumpi lianin ka koih ding a, ka sathau nilh pa’ ukna ka kipsak ding hi.

¹⁸ Ama galte maizumna tawh ka dimsak ding a, ahih hangin ama kumpi gam khangin zai semsem ding hi,” na ci hi.