Late 126 - Tedim Bible

Salin Omna Pan Ciahkikna

¹ Topa in Zion-ah eite hong ciahpih kik ciangin i mang tawh kibang liang hi.

² Lungdamin i nui a, lungdam lua-in la i sa hi. Tua ciangin minam dangte kiho-in, “Topa in amau a dingin na lianpite bawl khinta hi,” kici uh hi.

³ Topa in eite a dingin na lianpite bawl khinta a, eite i kipak hi.

⁴ Topa aw, lei keuna munah guah in tui a puak bangin kote’ nopsaknate a ngei hong bangsakkik ta in.

⁵ Khitui tawh khai a tuhte lungdamin kikona tawh an la sak ta in.

⁶ Kap kawmin kuankhia-in a tuh ding khaici a pua mi lungdamin kikona tawh buhlomte pua-in hong ciah ding hi.