Late 124 - Tedim Bible

Hotkhiatna hangin Phatna

¹ Israel mite aw, Topa in hong panpih lo hileh i tuah ding thu thei un.

² Eite langpangin mite hong kipat ciangin eite’ lamah Topa hong pang lo hileh,

³ eite’ tungah a hehna uh a kisosuah ciangin amaute in eite a hingin hong nawmvalh khin ding uh hi.

⁴ Tuikhang in eite hong tai-in, tuihual in hong tum khin ding a,

⁵ tuipi husiate in hong tuummang khin ding hi.

⁶ Amaute’ suksiat dingin eite a hong piakhia lo Topa in thupha ngah tahen.

⁷ Thangsiahte’ thangzak panin vasa a suahtak bangin eite i suakta hi. Thangkhau kibottat a, eite i suakta khinta hi.

⁸ Van le lei a bawl Topa’ tung panin eite huhna hong pai hi.